បរទេស៖ អគ្គស្នងការរងនគរបាលជាតិបាននិយាយថា ប៉ូលីសបានតាមដានគណនីធនាគារជាច្រើនដែលមាន ទឹកប្រាក់សរុបចំនួន ៧៨ លានបាតដែលជាប់ពាក់ព័ន្ធនឹងការសង្ស័យថា ជា “ឃាតករដោយដាក់ថ្នាំបំពុល” Sararat “Am” Rangsiwuthaporn ។
យោងតាមសារព័ត៌មាន The Nation របស់ថៃ ចេញផ្សាយនៅថ្ងៃទី១០ ខែ ឧសភា ឆ្នាំ២០២៣ បានឱ្យដឹងថា ឧត្តមសេនីយ Surachat Hakparn អគ្គស្នងការរងនគរបាលជាតិថៃ បាននិយាយកាលពីថ្ងៃអង្គារថា មានការផ្ទេរប្រាក់ជា បន្តបន្ទាប់ទៅកាន់ គណនីធនាគារផ្សេងៗគ្នាពីមនុស្សយ៉ាងហោចណាស់ ១២ នាក់។ លោកបន្តថាហេតុនេះ ប៉ូលិសកំពុងពិនិត្យមើលបន្ថែមទៀតលើការផ្ទេរនេះដើម្បីដោះស្រាយទំនាក់ទំនងរបស់ពួកគេជាមួយជនសង្ស័យ។
លោក Surachate បានបន្ថែមថា ប៉ូលីសកំពុងពន្លឿនការប្រមូលភស្តុតាងសំខាន់ៗ ហើយអាចទទួលបានដីកាចាប់ខ្លួន បន្ថែមទៀតសម្រាប់បុគ្គលផ្សេងទៀតដែលពាក់ព័ន្ធនឹងករណីនេះ។
ប៉ូលីសជឿថា នាង Sararat អាយុ ៣៦ឆ្នាំ បានបំពុលជនរងគ្រោះ ១៤នាក់ ដើម្បីលួចវត្ថុមានតម្លៃរបស់ពួកគេហើយ គេចពីបំណុលដែលនាងជំពាក់ពួកគេ។ ជនរងគ្រោះម្នាក់បានរួចជីវិត ហើយបានរាយការណ៍ប្រាប់ប៉ូលិស ។ មន្ត្រីបានចាប់ខ្លួន Sararat នៅអគាររដ្ឋាភិបាល Chaengwattana ក្នុងទីក្រុងបាងកក កាលពីថ្ងៃទី ២៥ ខែមេសា។ រហូតមកដល់ពេលនេះ នាងត្រូវបានចោទប្រកាន់ពីបទមនុស្សឃាតចំនួន ១០ ប៉ុន្តែលោក Surachet បាននិយាយថា ប៉ូលីសមានភស្តុតាងគ្រប់គ្រាន់ដើម្បីកាត់ទោសនាងចំពោះការស្លាប់មនុស្សទាំង ១៤ នាក់៕
ប្រែសម្រួលៈ ណៃ តុលា
