បរទេស ៖ គណបក្សភឿថៃ នៅតែមិនព្រមព្រៀងជាមួយគណបក្ស Move Forward លើតំណែងប្រធានសភា ដោយទទូចថា តំណែងនេះ ត្រូវបានបំពេញដោយបេក្ខជនម្នាក់ មកពីគណបក្សរបស់ខ្លួន នៅមុនកិច្ចប្រជុំ ដែលបានគ្រោងទុកនៅថ្ងៃអង្គារ ដើម្បីស្វែងរកដំណោះស្រាយ ចំពោះជម្លោះលើតំណែងនេះ ។
យោងតាមសារព័ត៌មានថៃ បាងកក ប៉ុស្តិ៍ ចេញផ្សាយនៅថ្ងៃទី៣០ ខែឧសភា ឆ្នាំ២០២៣ បានឱ្យដឹងថា អគ្គលេខាធិការគណបក្សភឿថៃ លោក ប្រាសឺត ចាន់តារ៉ារួងថន (Prasert Chantararuangthong) បាននិយាយកាលពីថ្ងៃចន្ទថា តួនាទីប្រធានសភាគួរតែត្រូវបានបំពេញដោយបេក្ខជនគណបក្សភឿថៃ។
លោក ប្រាសឺត បាននិយាយថា “នៅពេលដែលគណបក្ស Move Forward ចង់កាន់តំណែងជានាយករដ្ឋមន្ត្រី តួនាទីប្រធានសភាគួរតែជារបស់គណបក្ស ភឿថៃ”។
លោកបានបន្ថែមថា៖ «វាគួរទុកឲ្យភាគីទាំងពីរដោះស្រាយបញ្ហានេះ ព្រោះវាមិនមានពាក់ព័ន្ធនឹងដៃគូចម្រុះផ្សេងទៀតទេ»។
លោក Prasert ក្រោយមកបាននិយាយទៀតថា គណបក្សភឿថៃ និង Move Forward បានសម្រេចថាបញ្ហាតំណែងប្រធានសភា នឹងត្រូវបានពិភាក្សាដោយគណបក្សទាំងពីរ នៅក្នុងកិច្ចប្រជុំនៅថ្ងៃអង្គារនេះ។
ជម្លោះលើអ្នកដែល គួរទទួលបានតំណែងប្រធានសភានេះ គឺបានផ្ទុះឡើងជាច្រើនថ្ងៃនៅក្នុងការសម្ភាសន៍ និងនៅលើប្រព័ន្ធផ្សព្វផ្សាយសង្គម ដែលជំរុញឱ្យមេដឹកនាំគណបក្ស Move Forward និង បេក្ខជននាយករដ្ឋមន្ត្រី លោក ពីតា លឹមចារឿនរ៉ាត់ (Pita Limjaroenrat) កាលពីថ្ងៃសុក្រដើម្បីអំពាវនាវឱ្យដៃគូចម្រុះរក្សាការរួបរួម និងដោះស្រាយបញ្ហាតាមរយៈការសន្ទនា។
លោក ចៃថាវ៉ាត់ ទូឡាតុន (Chaithawat Tulaton) អគ្គលេខាធិការ គណបក្ស Move Forward ក្នុងសមត្ថភាព របស់លោកជាអ្នកសម្របសម្រួល របស់គណបក្ស នៅក្នុងកិច្ចពិភាក្សាដើម្បីបង្កើតសម្ព័ន្ធ ដែលដឹកនាំដោយគណបក្ស Move Forward បាននិយាយមុននេះថា ការពិភាក្សាត្រូវបានរំពឹងថា នឹងចាប់ផ្តើមនៅម៉ោង ២ និង ៣០នាទី រសៀលថ្ងៃអង្គារនៅទីស្នាក់ការកណ្តាលរបស់គណបក្ស ប្រាឆាឆាត ។
លោក ចៃថាវ៉ាត់ បាននិយាយថា លោក ពីតា កំពុងជំរុញឱ្យភាគីចម្រុះទាំងអស់ សហការគ្នា៕
