ម៉ូស្គូ៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានទាមទារកងកម្លាំងរុស្ស៊ី ពង្រឹងការការពារដែនអាកាសរបស់ខ្លួន ជុំវិញទីក្រុងមូស្គូ បន្ទាប់ពីការវាយប្រហារដោយយន្តហោះដ្រូន ដ៏ធំបំផុត លើរដ្ឋធានីរបស់ខ្លួន ចាប់តាំងពីលោក បានបញ្ជាឱ្យមានការឈ្លានពាន អ៊ុយក្រែន។
លោក ពូទីន បានឲ្យដឹងនៅក្នុងអត្ថាធិប្បាយតាមទូរទស្សន៍កាលពីថ្ងៃអង្គារថា ការវាយប្រហារនេះពាក់ព័ន្ធនឹង យន្តហោះដ្រូនចំនួន ៨គ្រឿង ដែលត្រូវបានស្ទាក់ចាប់ និងកំទេចចោល នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National។
លោកបានលើកឡើងថា “វាច្បាស់ណាស់នូវអ្វីដែលត្រូវធ្វើដើម្បីបិទការការពារដែនអាកាសក្នុងរដ្ឋធានី”។ ក្រសួងការពារជាតិរុស្ស៊ី បានស្តីបន្ទោសអ៊ុយក្រែន ចំពោះការវាយលុកនេះ ដោយថា កាំជ្រួចបានបាញ់ទម្លាក់យន្តហោះដ្រូនចំនួន ៥ គ្រឿង ខណៈដែលការរារាំងលើប្រព័ន្ធអេឡិចត្រូនិចត្រូវបានប្រើ ដើម្បីបង្វែរទិសដៅ ៣ផ្សេងទៀតពីគោលដៅរបស់ពួកគេ។
ក្រសួងការបរទេសបានគំរាមកំហែង “ការសងសឹកដ៏ឃោរឃៅបំផុត” ប្រឆាំងនឹងទីក្រុងគៀវ សម្រាប់ការវាយប្រហារនេះ ខណៈរដ្ឋមន្ត្រីការពារជាតិរុស្ស៊ីបានបញ្ជាក់ថា ការវាយលុករបស់អ៊ុយក្រែន នឹងចាប់ផ្តើមនៅប៉ុន្មានថ្ងៃទៀត។
ការវាយប្រហារដោយយន្តហោះដ្រូន គឺជាអ្វីដែលអ្នកនយោបាយម្នាក់ហៅថា “ការវាយប្រហារដ៏អាក្រក់បំផុតលើរដ្ឋធានីរបស់រុស្ស៊ី ចាប់តាំងពីសង្គ្រាមលោកលើកទី២”។
រុស្ស៊ីបានបើកការវាយប្រហារដោយខ្លួនឯងពេញមួយយប់ ដោយបានសម្លាប់មនុស្ស ៤ នាក់នៅទូទាំងប្រទេសអ៊ុយក្រែន។ មិនទាន់មានការអះអាងពីការទទួលខុសត្រូវភ្លាមៗចំពោះការវាយប្រហារលើរដ្ឋធានីរុស្ស៊ីនោះទេ៕
ប្រែសម្រួល ឈូក បូរ៉ា
