ប៉េកាំង៖ ចិនដីគោក នឹងមើលឃើញកំណើនស្ថិរភាពក្នុងការ នាំចេញទំនិញរហូតដល់ឆ្នាំ២០៣០ ហើយបន្តដើរតួនាទី ឈានមុខគេក្នុងការជំរុញ ពាណិជ្ជកម្មទំនិញសកល នេះបើយោងតាមរបាយការណ៍ ដែលបានចេញផ្សាយកាលពីថ្ងៃពុធ។
ការរកឃើញនៃរបាយការណ៍ ដែលចេញផ្សាយដោយធនាគារពហុជាតិ ដែលមានមូលដ្ឋាននៅចក្រភពអង់គ្លេស Standard Chartered បានផ្តល់សញ្ញាចុងក្រោយបង្អស់ ដែលថាអ្នកដឹកនាំធុរកិច្ចពិភពលោក នៅតែមានទំនុកចិត្តលើវិស័យនាំចេញ របស់ ប្រទេសចិន បើទោះបីជាមានការអំពាវនាវកាន់តែខ្លាំងពីសហរដ្ឋអាមេរិក និងសម្ព័ន្ធមិត្តមួយចំនួនឱ្យ “កាត់បន្ថយ” ឬ “បដិសេធហានិភ័យ” នៃទំនាក់ទំនងពាណិជ្ជកម្មរបស់ពួកគេជាមួយប្រទេសចិនក៏ដោយ។
យោងតាមរបាយការណ៍បានឱ្យដឹងថា រហូតមកដល់ឆ្នាំ២០៣០ ការនាំចេញទំនិញរបស់ប្រទេសចិនត្រូវបានគេរំពឹងថា នឹងមានអត្រាកំណើនប្រចាំឆ្នាំ ៤,៧ភាគរយ ហើយការនាំចេញសរុបទំនងជានឹងកើនឡើងដល់ ៤,៣៧ ពាន់ពាន់លានដុល្លារ។
របាយការណ៍បានឲ្យដឹងថា ចិនដីគោក នឹងបន្តដើរតួនាទីឈានមុខគេក្នុងពាណិជ្ជកម្មពិភពលោកលើទំនិញ និងជាកត្តាជំរុញកំណើនដ៏សំខាន់ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន GlobalTime។
រចនាសម្ព័ន្ធការនាំចេញរបស់ប្រទេសចិន ទំនងជានឹងត្រូវបានធ្វើឱ្យប្រសើរឡើង ដោយសារតែទំនិញមេកានិច និងអេឡិចត្រូនិច នឹងក្លាយជាផលិតផលនាំចេញដ៏សំខាន់ដែលមានចំនួន ៥២ ភាគរយនៃចំនួនសរុប។
របាយការណ៍នេះបានស្នើថា ឥណ្ឌាត្រូវបានគេរំពឹងថា នឹងក្លាយទៅជាទិសដៅរីកចម្រើនបំផុត សម្រាប់ការនាំចេញទំនិញ របស់ចិនដីគោក លើសប្រទេសកូរ៉េខាងត្បូង អាល្លឺម៉ង់ និងវៀតណាមនៅឆ្នាំ២០៣០។
បន្ទាប់មក វានឹងក្លាយជាទិសដៅនាំចេញធំទីពីរ សម្រាប់ចិនដីគោក ដែលមានតម្លៃសរុប ២១២ ពាន់លានដុល្លារ ដែលស្ថិតនៅលំដាប់ទីពីរបន្ទាប់ពីតំបន់រដ្ឋបាលពិសេសហុងកុង៕
