បរទេស៖ ប្រទេសអាហ្រ្វិកខាងត្បូងកំពុងរៀបចំ ផែនការផ្លាស់ប្តូរច្បាប់ដើម្បីធ្វើឱ្យច្បាប់ជាតិ របស់ខ្លួនមានអំណាចលើសពី តុលាការឧក្រិដ្ឋកម្មអន្តរជាតិ (ICC) នេះបើយោងតាមអនុរដ្ឋមន្ត្រីមួយ។ ចំណាត់ការនេះធ្វើឡើងបន្ទាប់ពីតុលាការ ICC បានចេញដីកាចាប់ខ្លួន ប្រធានាធិបតីរុស្ស៊ីលោក វ្ល៉ាឌីមៀ ពូទីន។
យោងតាមសារព័ត៌មាន RT ចេញផ្សាយកាលពីថ្ងៃទី១ ខែមិថុនា ឆ្នាំ២០២៣ បានឱ្យដឹងថា លោក Obed Bapela អនុរដ្ឋមន្ត្រីនៅអាហ្រ្វិកខាងត្បូង បានប្រាប់សារព័ត៌មាន BBC កាលពីថ្ងៃពុធថា “នៅក្នុងខែមិថុនា យើងនឹងដាក់ច្បាប់ទៅសភា” ។ លោក Bapela បានបន្តថា ច្បាប់នេះនឹងអនុញ្ញាតឱ្យអាហ្រ្វិកខាងត្បូង “ផ្តល់ការលើកលែងដោយខ្លួនឯងថា អ្នកណាត្រូវចាប់ខ្លួន និងអ្នកណាមិនចាប់ខ្លួន” ។
កាលពីពាក់កណ្តាលខែមីនា តុលាការឧក្រិដ្ឋកម្មអន្តរជាតិ ICC បានចេញដីកាចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀ ពូទីន និងលោកស្រី ម៉ារៀ ឡូវ៉ា-បេឡូវ៉ា មន្ត្រីជាន់ខ្ពស់បន្ទុកសិទ្ធិកុមារ។ តុលាការបានចោទប្រកាន់អ្នកទាំងពីរពីបទ “ការបញ្ជូនប្រជាជនដោយបង្ខំ” ដោយសំដៅលើកិច្ចខិតខំប្រឹងប្រែង របស់ទីក្រុងម៉ូស្គូ ក្នុងការជម្លៀសកុមារចេញពីតំបន់ប្រយុទ្ធ ចំពេលមានអរិភាពជាមួយអ៊ុយក្រែន។
រុស្ស៊ីបានឆ្លើយតបដោយនិយាយថា ICC មិនមានសិទ្ធិអំណាច ឬស្របច្បាប់ទេ ព្រោះទីក្រុងម៉ូស្គូ មិនដែលផ្តល់ការអនុម័តលើលក្ខន្តិកៈទីក្រុងរ៉ូមឆ្នាំ ១៩៩៨ ដែលបង្កើតតុលាការឡើយ៕
ប្រែសម្រួលៈ ណៃ តុលា
