បរទេស៖ ប្រធានាធិបតីអាមេរិក Joe Biden បានបញ្ជូនប្រធាន CIA លោក William Burns ទៅកាន់ទីក្រុងប៉េកាំងកាលពីខែមុន ដើម្បីជួបជាមួយមន្ត្រីស៊ើបការណ៍សម្ងាត់របស់ចិន, នេះបើយោងតាមសារព័ត៌មាន Financial Times បានរាយការណ៍កាលពីថ្ងៃសុក្រ ដោយដកស្រង់ប្រភពអនាមិករបស់អាមេរិក។
យោងតាមសារព័ត៌មាន RT ចេញផ្សាយកាលពីថ្ងៃទី២ ខែមិថុនា ឆ្នាំ២០២៣ បានឱ្យដឹងថា បណ្តាញផ្សព្វផ្សាយបានពិពណ៌នាលោក Burns ថាជា “មន្ត្រីដែលគួរឱ្យទុកចិត្តបំផុតមួយរបស់លោក Biden” ហើយបានអះអាងថា ដំណើរទស្សនកិច្ចនេះបង្ហាញពី “ការព្រួយបារម្ភដែលសេតវិមានបានក្លាយទៅជាអំពីទំនាក់ទំនងកាន់តែយ៉ាប់យ៉ឺនរវាងទីក្រុងប៉េកាំង និងទីក្រុងវ៉ាស៊ីនតោន” ។
ខណៈពេលដែលសេតវិមាន និង CIA មិនបានបញ្ជាក់ជាផ្លូវការអំពីដំណើរទស្សនកិច្ចនេះ Financial Times បានពឹងផ្អែកលើ “ប្រភពប្រាំនាក់ដែលដឹងពីស្ថានភាព” ។ ម្នាក់ក្នុងចំណោមពួកគេ ដែលត្រូវបានកំណត់អត្តសញ្ញាណត្រឹមតែជាមន្ត្រីអាមេរិកម្នាក់ បាននិយាយថា លោក Burns “បានជួបជាមួយសមភាគីចិន ហើយបានសង្កត់ធ្ងន់លើសារៈសំខាន់នៃការរក្សាទំនាក់ទំនងបើកចំហរនៅក្នុងបណ្តាញស៊ើបការណ៍សម្ងាត់”។
គេមិនច្បាស់ទេថាតើលោក Burns បានធ្វើដំណើរទៅកាន់ទីក្រុងប៉េកាំងមុន ឬក្រោយកិច្ចប្រជុំកាលពីថ្ងៃទី ១០ ខែឧសភា រវាងទីប្រឹក្សាសន្តិសុខជាតិរបស់លោក Biden លោក Jake Sullivan និងអ្នកការទូតជាន់ខ្ពស់របស់ប្រទេសចិន លោក Wang Yi នៅទីក្រុងវីយែន៕
ប្រែសម្រួលៈ ណៃ តុលា
