ព័ត៌មានអន្តរជាតិ

អ៊ុយក្រែន ​បង្កើន​ប្រតិបត្តិការវាយបក ​ខណៈ​ការ​បំផ្លាញ​ទំនប់​ Kakhovka ជាដើមហេតុជួយបង្កើន កំដៅសង្គ្រាម

គៀវ៖ ការកើនឡើងនៃប្រតិបត្តិការយោធាអ៊ុយក្រែន ការវាយឆ្មក់ឆ្លងព្រំដែនដោយយន្តហោះដ្រូន និងក្រុមប្រដាប់អាវុធ និងអាថ៌កំបាំងអំពីអ្នក ដែលបានបំផ្ទុះទំនប់ទឹកដែលជន់លិចដី ជាច្រើន នៅតាមដងទន្លេ Dnipro។ ព្រឹត្តិការណ៍កំពុងដំណើរការ យ៉ាងលឿន នៅក្នុងសង្គ្រាមរបស់រុស្ស៊ី លើអ៊ុយក្រែន ដែលឥឡូវនេះនៅក្នុងសប្តាហ៍ទី៦៧ របស់ខ្លួន។

មេបញ្ជាការកងទ័ពជើងគោកអ៊ុយក្រែន លោក Oleksandr Syrskyi បានឲ្យដឹងថា ទាហានរបស់លោក កំពុងរុលទៅមុខនៅទីក្រុង បាក់មុត កាលពីថ្ងៃចន្ទ បន្ទាប់ពីស្ងប់ស្ងាត់ ២ ទៅ ៣ថ្ងៃ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Aljazeera។

អនុរដ្ឋមន្ត្រីការពារជាតិអ៊ុយក្រែនលោកស្រី Hanna Maliar បានបញ្ជាក់នៅលើ Telegram ឲ្យដឹងថា “ទិសដៅទីក្រុងបាក់មុត នៅតែជាចំណុចកណ្តាលនៃអរិភាពនៃការវាយបក ដោយបញ្ជាក់ថា នៅទីនោះ ពួកយើងកំពុងធ្វើដំណើរតាមជួរមុខ ដ៏ធំទូលាយមួយ” ។

លោកស្រី Maliar បានលើកឡើងថា កងទ័ពអ៊ុយក្រែ នបានឈានទៅដល់ចម្ងាយ ១៦០០ម៉ែត្រ (៥២៥០ ហ្វីត) ភាគខាងជើងនៃទីក្រុងបាក់មុត និងរហូតដល់ ៧០០ម៉ែត្រ (២៣០០ ហ្វីត) ទៅភាគខាងត្បូងនៅក្នុងសមយុទ្ធមួយនៅខាងមុខ។

រុស្ស៊ី​បាន​ទាមទារ​យក​ជ័យ​ជម្នះ​នៅទីក្រុងបាក់មុត នៅ​ថ្ងៃ​ទី២១ ខែ​ឧសភា ហើយ ៩​ថ្ងៃ​ក្រោយ​មក អ៊ុយក្រែន​បាន​ទទួល​ស្គាល់​ថា ទីក្រុង​នេះ​ស្ថិត​ក្នុង​ដៃ​របស់​រុស្ស៊ី ​បន្ទាប់​ពី​សង្គ្រាម​បង្ហូរ​ឈាម​អស់​រយៈពេល ១០ខែ។

ក្រសួងការពារជាតិរុស្ស៊ីបានឲ្យដឹងថា កងកម្លាំងអ៊ុយក្រែន កាលពីថ្ងៃអាទិត្យបានចាប់ផ្តើម “ការវាយលុកទ្រង់ទ្រាយធំ” នៅទូទាំងផ្នែកចំនួនប្រាំនៃរណសិរ្សភាគខាងកើត។ រដ្ឋមន្ត្រីការពារជាតិលោក Sergei Shoigu បានលើកឡើងថា កងកម្លាំងរុស្ស៊ី បានវាយលុករាល់ការវាយប្រហារ និងបានសម្លាប់ទាហានអ៊ុយក្រែន ៣១៧៥ នាក់ក្នុងរយៈពេល ៣ថ្ងៃ។

វិទ្យាស្ថានសម្រាប់ការសិក្សាសង្គ្រាម ដែលមានមូលដ្ឋាននៅទីក្រុង វ៉ាស៊ីនតោន បានឲ្យដឹងថា “ប្រភពរុស្ស៊ី ពីមុនបានព្យាយាមលាបពណ៌សកម្មភាពវាយលុករបស់អ៊ុយក្រែនជាការបរាជ័យភ្លាមៗ ហើយប្រភពរុស្ស៊ី ទំនងជាព្យាយាមធ្វើដូចគ្នា ជាមួយនឹងអ្វីដែលពួកគេចាត់ទុកថា ជាការចាប់ផ្តើមនៃការវាយលុករបស់អ៊ុយក្រែន ដែលបានប្រកាស” ។

អ៊ុយក្រែន ​មិន​បាន​ប្រកាស​ពី​ការ​វាយ​បក​របស់​ខ្លួន ​បាន​ចាប់​ផ្តើម​នោះទេ ប៉ុន្តែលោកស្រី Maliar បាន​បង្ហោះ​វីដេអូ​មួយ​នៅ​លើ​ប៉ុស្តិ៍ Telegram របស់លោក​កាល​ពី​ថ្ងៃ​អាទិត្យ ដែល​បង្ហាញ​ពី​ទាហាន​អ៊ុយក្រែន​កាន់​ម្រាមដៃ​ប៉ះ​បបូរមាត់​របស់​ពួកគេ។ ចំណង​ជើង​របស់​នាង​សរសេរ​ថា “ផែនការ​ស្រឡាញ់​ភាព​ស្ងៀម​ស្ងាត់។ វា​នឹង​មិន​មាន​ការ​ប្រកាស​ពី​ការ​ចាប់​ផ្តើម​នោះ​ទេ”៕

ប្រែសម្រួល ឈូក បូរ៉ា

To Top