បរទេស ៖ ឧបនាយករដ្ឋមន្ត្រី របស់វៀតណាម លោក ត្រាន់ លូ ហ្គាង (Tran Luu Quang) កាលពីថ្ងៃចន្ទ បានទៅសួរសុខទុក្ខ ជនរងគ្រោះនៅក្នុងការវាយប្រហារ ដោយកាំភ្លើង ដែលបានសម្លាប់មេឃុំពីរនាក់ និងមន្ត្រីប៉ូលីសបួននាក់ នៅក្នុងខេត្ត ដាក់ឡាក់ ( Dak Lak) ដែលនៅជាប់ខេត្តមណ្ឌលគិរី របស់កម្ពុជា ។
យោងតាមសារព័ត៌មាន VN Express ចេញផ្សាយកាលពីថ្ងៃទី១២ ខែមិថុនា ឆ្នាំ២០២៣ បានឱ្យដឹងថា គណៈប្រតិភូដឹកនាំដោយលោក Quang បានទៅសួរសុខទុក្ខគ្រួសាររបស់លោក Nguyen Van Kien អតីតលេខាបក្សឃុំ អេខ្ទ័រ (Ea Ktur) និងលោក ង្វៀន វ៉ាន់ដុង (Nguyen Van Dung) អតីតប្រធានឃុំ អេទ័រ (Ea Tieu), ពួកគេត្រូវបានគេសម្លាប់ នៅតាមផ្លូវទៅកាន់ទីស្នាក់ការគណៈកម្មាធិការប្រជាជនឃុំ បន្ទាប់ពីឮថាការិយាល័យ គឺត្រូវបានវាយប្រហារកាលពីព្រឹកថ្ងៃអាទិត្យ ។
លោកឧបនាយករដ្ឋមន្ត្រីវៀតណាម ក៏បានចុះសួរសុខទុក្ខគ្រួសារមន្ត្រីនគរបាលចំនួន ៤នាក់ ដែលបានស្លាប់ក្នុងការវាយប្រហារ និងមន្ត្រីនគរបាលចំនួន ២នាក់ ដែលរងរបួសកំពុងសម្រាកព្យាបាល នៅមន្ទីរពេទ្យ ផងដែរ។
សូមជម្រាបថា កាលពីព្រឹកថ្ងៃអាទិត្យ មានជនប្រដាប់អាវុធមួយក្រុមបានវាយប្រហារការិយាល័យគណៈកម្មាធិការប្រជាជន អេទ័រ និង ឃុំ អេទ័រ ក្នុងស្រុក គូគៀន ដោយបានសម្លាប់មន្ត្រីប៉ូលីស៤ នាក់, មេឃុំ ២ នាក់ និងសម្លាប់ជនស៊ីវិល ៣នាក់ ទៀត។
អាជ្ញាធរបាននិយាយថា ជនសង្ស័យចំនួន ២៧នាក់ ត្រូវបានចាប់ខ្លួនពីបទជាប់ពាក់ព័ន្ធក្នុងការវាយប្រហារ និងការរឹបអូសបានអាវុធ មួយចំនួនគិតត្រឹមថ្ងៃត្រង់ថ្ងៃច័ន្ទ។
រដ្ឋាភិបាលវៀតណាម បានប្រកាសនឹងផ្តល់សំណងដល់គ្រួសារមន្ត្រីប៉ូលិសបួននាក់ ដែលត្រូវបានសម្លាប់ក្នុង ការវាយប្រហារនូវទឹកប្រាក់ចំនួន ១០០ លានដុង ស្មើនឹង ៤ ២៦០ដុល្លារក្នុងម្នាក់ៗ ចំណែកប៉ូលិសរងរបួសទាំងពីរនាក់ នឹងទទួលបានម្នាក់ៗ ៥០លានដុង ៕
