បរទេស៖ នាយករដ្ឋមន្ត្រីថៃ លោកឧត្តមសេនីយ៍ ប្រាយុទ្ធ ចាន់អូចា បានចាប់ផ្តើមរៀបចំឥវ៉ាន់ របស់លោកហើយ សម្រាប់ការចាកចេញ ពីតំណែងនៅវិមានរដ្ឋាភិបាល។
យោងតាមសារព័ត៌មានថៃ បាងកក ប៉ុស្តិ៍ ចេញផ្សាយកាលពីថ្ងៃទី២១ ខែមិថុនា ឆ្នាំ២០២៣ បានឱ្យដឹងថា ដំណើរការរើឥវ៉ាន់ចេញជាបណ្តើរៗនេះ បានចាប់ផ្តើមបន្ទាប់ ពីគណៈកម្មាធិការរៀបចំការបោះឆ្នោត (EC) កាលពីថ្ងៃច័ន្ទបានបញ្ជាក់ពីការបោះឆ្នោត សមាជិកសភាទាំង ៥០០ រូប ទាំងមកពីប្រព័ន្ធបោះឆ្នោត និងប្រព័ន្ធបញ្ជីគណបក្ស ។
ឧត្តមសេនីយ៍ ប្រាយុទ្ធ កាលពីថ្ងៃពុធបានរាយការណ៍ថា នឹងធ្វើការដូចធម្មតា ចំពេលបរិយាកាសស្ងប់ស្ងាត់ នៅឯវិមានរដ្ឋាភិបាល។
ប្រភពមួយបាននិយាយថា ការរើឥវ៉ាន់របស់លោក កំពុងតែប្រព្រឹត្តទៅ ដោយក្រុមផ្ទាល់របស់លោកឧត្តមសេនីយ៍ បានដកយករបស់របរ និងវត្ថុមានតម្លៃមួយចំនួន ពីការិយាល័យនាយករដ្ឋមន្ត្រី រួមទាំងរូបព្រះពុទ្ធបដិមាផងដែរ។
វត្ថុទាំងនោះត្រូវបានបញ្ជូនត្រឡប់ ទៅគេហដ្ឋានរបស់លោកវិញ នៅមូលដ្ឋានកងវរសេនាធំថ្មើរជើងទី១ ក្នុងទីក្រុងបាងកក ។ ឯកសារសំខាន់ៗមួយចំនួន ដែលមានលក្ខណៈមិនត្រូវបានបញ្ជាក់ ក៏ត្រូវបានបញ្ជូនទៅដូចគ្នាផងដែរ៕
