អង់ការ៉ា៖ ប្រធានាធិបតីទួរគីលោក Recep Tayyip Erdogan កាលពីថ្ងៃសុក្របានជំទាស់ថា ប្រទេសរបស់លោក នឹងមិនបើកភ្លើងខៀវ ចំពោះការចូលជាសមាជិករបស់ស៊ុយអែត ទៅក្នុងអង្គការណាតូនោះទេ លុះត្រាតែប្រទេស Nordic ប្រកាន់ជំហររឹងមាំប្រឆាំងនឹង “ក្រុមភេរវកម្ម”។
តើរដ្ឋដែលមិនឃ្លាតឆ្ងាយពីអង្គការភេរវជន អាចរួមចំណែកដល់ណាតូ បានដោយរបៀបណា? នេះជាសំនួររបស់លោក Erdogan នៅក្នុងពិធីប្រគល់សញ្ញាបត្ររបស់សាកលវិទ្យាល័យការពារជាតិក្នុងទីក្រុងអ៊ីស្តង់ប៊ុល។
លោកបានលើកឡើងថា រដ្ឋាភិបាលរបស់លោករំពឹងថា ប្រទេសស៊ុយអែត នឹងគោរពតាមការសន្យារបស់ខ្លួនក្នុងការគិតគូរពីកង្វល់សន្តិសុខរបស់តួកគី ដោយបន្ថែមថា លោកនឹងនាំយកការយកចិត្តទុកដាក់របស់សម្ព័ន្ធមិត្តនៅក្នុងកិច្ចប្រជុំកំពូលរបស់អង្គការណាតូ ដែលធ្វើឡើងនៅទីក្រុងវីលនីស ប្រទេសលីទុយអានី នៅសប្តាហ៍ក្រោយ។
លោកប្រធានាធិបតីបានបន្ដថា តួកគី បានគាំទ្រគោលនយោបាយបើកចំហរបស់អង្គការណាតូ ហើយបានត្រៀមខ្លួនជាស្រេច ដើម្បីស្វាគមន៍រដ្ឋណាមួយ ដែលបានប្តេជ្ញាចិត្ត ចំពោះគោលការណ៍ជាមូលដ្ឋានរបស់សម្ព័ន្ធភាព។
ប្រទេសស៊ុយអែត និងហ្វាំងឡង់ បានដាក់ពាក្យចូលជាសមាជិកអង្គការណាតូ កាលពីឆ្នាំមុន ប៉ុន្តែបានប្រឈមមុខនឹងការជំទាស់ពីប្រទេសតួកគី ក្រោមហេតុផលថា ប្រទេសទាំងពីរបានកាន់កាប់សមាជិក នៃគណបក្សពលករឃឺឌីស្ថានខុសច្បាប់ និងចលនា Gulen ។
តួកគី នៅទីបំផុតបានដកការជំទាស់របស់ខ្លួនចំពោះហ្វាំងឡង់ នៅដើមឆ្នាំនេះ បន្ទាប់ពីប្រទេស Nordic បានចាត់វិធានការជាក់ស្តែងប្រឆាំងនឹងក្រុមទាំងនេះ ហើយប្រទេសនេះបានបន្តក្លាយជាសមាជិកទី៣១ របស់ណាតូ ក្នុងខែមេសា ប៉ុន្តែទីក្រុងអង់ការ៉ា រក្សាវេតូលើសមាជិកភាពរបស់ស៊ុយអែត៕ ប្រែសម្រួល ឈូក បូរ៉ា
