បរទេស៖ បំបែកភាពជាប់គាំងនយោបាយដែលមានរយៈពេលជិត ១០០ ថ្ងៃ បេក្ខជននាយករដ្ឋមន្ត្រី នៃគណបក្សភឿថៃ លោក ស្រែថា ថាវីស៊ីន បានទទួលជោគជ័យក្នុងការក្លាយជានាយករដ្ឋមន្ត្រីទី ៣០ របស់ប្រទេសថៃហើយ។
យោងតាមសារព័ត៌មាន The Nation ចេញផ្សាយនៅថ្ងៃទី២២ ខែសីហា ឆ្នាំ២០២៣ បានឱ្យដឹងថា លោក ស្រែថា ត្រូវបានស្នើឡើងដោយក្រុមចម្រុះដឹកនាំដោយគណបក្សភឿថៃ ដែលមានគណបក្សចំនួន ១១ ដែលរួមគ្នាមានអាសនៈភាគច្រើនក្នុងសភាជាន់ទាបដែលមាន ៣១៤ អាសនៈ។ ការបែងចែកតំណែងរដ្ឋមន្ត្រីត្រូវបានធ្វើឡើងមុនការបោះឆ្នោតជ្រើសរើសនាយករដ្ឋមន្ត្រីថ្ងៃនេះ។
បន្ទាប់ពីឡើងកាន់តំណែង រដ្ឋាភិបាលដឹកនាំដោយគណបក្សភឿថៃបានសន្យាថា នឹងដាក់របៀបវារៈសម្រាប់ធ្វើវិសោធនកម្មរដ្ឋធម្មនុញ្ញបច្ចុប្បន្ននៅក្នុងកិច្ចប្រជុំគណៈរដ្ឋមន្ត្រីលើកដំបូងរបស់ខ្លួន។ គណបក្សបានអះអាងថា រធម្មនុញ្ញឆ្នាំ ២០១៧ គឺជាបញ្ហាបច្ចុប្បន្នរបស់ប្រទេសថៃ។
សូមជម្រាបថា នៅថ្ងៃទី២២ សីហានេះដែរ អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា បានទៅដល់ប្រទេសថៃ បន្ទាប់ពីបានចំណាយពេល ១៥ឆ្នាំ រស់នៅនិរទេសខ្លួនឯង៕ ប្រែសម្រួលៈ ណៃ តុលា
