ញ៉ូដេលី៖ ប្រភពពីទីភ្នាក់ងារ Xinhua បានផ្សព្វផ្សាយ នៅថ្ងៃទី១៣ ខែកញ្ញា ឆ្នាំ២០២៣ថា មន្ត្រីសុខាភិបាលរបស់រដ្ឋ Keralaបានឲ្យដឹង កាលពីថ្ងៃអង្គារថា ការប្រកាសអាសន្ន សម្រាប់វីរុសម្យ៉ាងឈ្មោះថា Nipah ត្រូវបានផ្ទុះឡើង នៅផ្នែកខ្លះនៃរដ្ឋ Kerala របស់ប្រទេស ឥណ្ឌា បន្ទាប់ពី “ការស្លាប់ខុសពីធម្មជាតិ” ចំនួន២ករណី ត្រូវបានរាយការណ៍ ពីរដ្ឋភាគខាងត្បូង ហើយមនុស្សចំនួន៤នាក់ ត្រូវបានបញ្ជូនទៅមន្ទីរពេទ្យរដ្ឋ ។
បើយោងតាមមន្ត្រីបានបញ្ជាក់ថា ជនសង្ស័យទាំង៤នាក់ ដែលបានឆ្លងវីរុស Nipah រួមមានប្រពន្ធ និងកូនរបស់អ្នក ដែលត្រូវបានសង្ស័យថា បានស្លាប់ដោយសារជំងឺនេះ កាលពីថ្ងៃចន្ទ ។
លោកស្រី Veena George រដ្ឋមន្ត្រីសុខាភិបាលនៅរដ្ឋ Kerala បានថ្លែងថា គ្មានស្ថានភាពអ្នកជំងឺណាមួយធ្ងន់ធ្ងរនោះទេ ប៉ុន្តែបានអំពាវនាវដល់ប្រជាជននៅក្នុងស្រុក Kozhikode ឱ្យមានការប្រុងប្រយ័ត្នខ្ពស់ ។
លោកស្រីបានថ្លែងទៀតថា មន្ត្រីមន្ទីរសុខាភិបាលកំពុង តាមដានស្ថានការណ៍យ៉ាង ដិតដល់បំផុតចំពោះករណីនេះ ។
លោកស្រីរដ្ឋមន្រ្តីបានថ្លែងថា “លទ្ធផលនៃសំណាក ដែលត្រូវបានបញ្ជូន ទៅមន្ទីរពិសោធន៍ Pune Virology បន្ទាប់ពីសង្ស័យថា វីរុស Nipah នឹងត្រូវបានឆ្លង ហើយរកឃើញនៅពេលល្ងាច” ។
យោងតាមអង្គការ សុខភាពពិភពលោក (WHO) ការឆ្លងវីរុស Nipah គឺជាជំងឺ ដែលទើបនឹងកើតថ្មី ដែលបង្កឱ្យមានជំងឺធ្ងន់ធ្ងរ ទាំងក្នុងខ្លួនសត្វ និងមនុស្ស ។ កន្លែងដែលឆ្លងជំងឺ ក្នុងធម្មជាតិដែលបង្កឡើងជាមេរោគ គឺជាប្រភពពីចំណី របស់សត្វប្រចៀវនៃគ្រួសារ Pteropodidae និងប្រភេទ Pteropus ៕
ប្រែសម្រួលដោយ៖ ម៉ៅ បុប្ផាមករា
