ម៉ូស្គូ៖ ទីភ្នាក់ងារសារព័ត៌មាន Tass របស់រុស្ស៊ី បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានឲ្យដឹងថា លោកបានទទួលយកការអញ្ជើញរបស់ប្រធានាធិបតីចិន លោក ស៊ី ជីនពីង ដើម្បីបំពេញទស្សនកិច្ចនៅប្រទេសចិន ក្នុងខែតុលា សម្រាប់វេទិកាអន្តរជាតិ ស្តីពីគំនិតផ្តួចផ្តើមហេដ្ឋារចនាសម្ព័ន្ធពិភពលោក Belt and Road ដែលជាហត្ថលេខីរបស់ទីក្រុងប៉េកាំង។
នៅក្នុងជំនួបជាមួយអ្នកការទូតកំពូលរបស់ចិន លោក វ៉ាង យី នៅទីក្រុង St. Petersburg លោក ពូទីន បានសម្តែងការគាំទ្ររបស់លោក ចំពោះគម្រោងហេដ្ឋារចនាសម្ព័ន្ធ ដែលប្រារព្ធខួបលើកទី១០ របស់ខ្លួននៅឆ្នាំនេះ ដោយថាវាចុះសម្រុងគ្នានូវគំនិតរបស់យើង ក្នុងការបង្កើតលំហអឺរ៉ាស៊ីដ៏ធំទូលាយ និងមានលក្ខណៈពេញលេញ ដែលផលប្រយោជន៍របស់ទីក្រុងម៉ូស្គូ និងទីក្រុងប៉េកាំង។
លោក ពូទីន ក៏បានប្រាប់លោក វ៉ាង យី ថា រុស្ស៊ីមានឆន្ទៈក្នុងការដោះស្រាយវិបត្តិអ៊ុយក្រែន “តាមរយៈការសន្ទនា និងការចរចា” ដែលបច្ចុប្បន្នរុស្ស៊ីកំពុងមានសង្រ្គាមជាមួយអ៊ុយក្រែនបន្ទាប់ពីបានបើកការឈ្លានពានប្រទេសជិតខាងក្នុងខែកុម្ភៈ ឆ្នាំ២០២២។
លោកប្រធានាធិបតីបានលើកឡើងថា រុស្ស៊ីចង់រក្សាការសម្របសម្រួលយ៉ាងជិតស្និទ្ធជាមួយប្រទេសចិន ក្នុងក្របខ័ណ្ឌពហុភាគីដូចជា អង្គការសហប្រតិបត្តិការសៀងហៃ និងយន្តការ BRICS “ដើម្បីទប់ទល់នឹងអនុភាពឯកតោភាគី និងការប្រឈមមុខដាក់គ្នាក្នុងប្លុក ដើម្បីការពារយុត្តិធម៌ និងយុត្តិធម៌អន្តរជាតិ” ។
ការថ្លែងរបស់លោកបានបង្ហាញពីការប្រឆាំងនឹងសណ្តាប់ធ្នាប់អន្តរជាតិដែលដឹកនាំដោយសហរដ្ឋអាមេរិក។ ក្រសួងបានឲ្យដឹងថា លោក វ៉ាង យី បានគាំទ្រទស្សនៈរបស់លោកពូទីន ដោយថា “ពិភពលោកកំពុងឆ្ពោះទៅរកភាពពហុប៉ូលយ៉ាងឆាប់រហ័ស”៕
ប្រែសម្រួល ឈូក បូរ៉ា
