បរទេស ៖ នាយករដ្ឋមន្រ្តីថៃ លោកស្រែថា ថាវីស៊ីន កាលពីថ្ងៃសុក្រ បានបដិសេធ ចំពោះព័ត៌មានថា លោកបាននិយាយថា លោកនឹងតែងតាំងអតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា ជាទីប្រឹក្សា ប៉ុន្តែលោកបានបន្ថែមថា លោកស្វាគមន៍ដំបូន្មាន ពីអតីតនាយករដ្ឋមន្ត្រីទាំងអស់ ប្រសិនបើដំបូន្មាននោះ ផ្តល់ផលប្រយោជន៍ដល់ប្រទេស។
យោងតាមសារព័ត៌មាន The Nation ចេញផ្សាយនៅថ្ងៃទី២៣ ខែកញ្ញា ឆ្នា២០២៣ បានឱ្យដឹងថា លោក ស្រែថា បានបញ្ជាក់ពីការលើកឡើងដែលបានធ្វើឡើងក្នុងបទសម្ភាសន៍ជាមួយទូរទស្សន៍ Bloomberg ក្នុងទីក្រុងញូវយ៉ក កាលពីថ្ងៃព្រហស្បតិ៍។ សារព័ត៌មាននានា បានបកស្រាយការអត្ថាធិប្បាយ របស់លោកថា ជាការបង្ហាញថា លោកថាក់ស៊ីន នឹងទទួលបានតួនាទីជាទីប្រឹក្សា នៅក្នុងរដ្ឋាភិបាល របស់លោកនៅពេល ដែលអតីតនាយករដ្ឋមន្ត្រី ត្រូវបានដោះលែងពីពន្ធនាគារ។
លោក ស្រែថា បានប្រាប់សារព័ត៌មាន Bloomberg ថា “ខ្ញុំជឿថា លោក [ថាក់ស៊ីន] មានតម្លៃក្នុងការបន្ថែមទៅរដ្ឋាភិបាល និងប្រជាជនថៃ” ហើយ “វាជារឿងមិនសមហេតុផល សម្រាប់ខ្ញុំក្នុងការមិនស្វែងរកយោបល់ របស់គាត់ និងពីនាយករដ្ឋមន្រ្តីផ្សេងទៀតផងដែរ” ។
កាលពីថ្ងៃសុក្រ លោក ស្រែថា បានប្រាប់អ្នកសារព័ត៌មាន ឱ្យពិនិត្យមើលបទសម្ភាសន៍ដោយប្រុងប្រយ័ត្ន ដោយទទូចថា លោកមិនដែលនិយាយថា នឹងតែងតាំងលោកថាក់ស៊ីន ជាទីប្រឹក្សានោះទេ ។
លោកបានបន្តថា “ខ្ញុំត្រូវបានគេសួរថា តើខ្ញុំនឹងពិគ្រោះជាមួយលោកថាក់ស៊ីនដែរឬទេ ហើយខ្ញុំបានឆ្លើយថា ខ្ញុំនឹងពិគ្រោះជាមួយអតីតនាយករដ្ឋមន្ត្រីទាំងអស់”។ “អ្នកដំបូងដែលខ្ញុំស្វែងរកដំបូន្មានគឺ ឧត្តមសេនីយ៍ ប្រាយុទ្ធ ចាន់អូចា ពេលខ្ញុំឡើងកាន់តំណែង”។
នាយករដ្ឋមន្រ្តីថៃរូបនេះ ក៏បាននិយាយដែរថា លោកបានជួបអតីតនាយករដ្ឋមន្ត្រីផ្សេងទៀតតាំងពីចូលកាន់តំណែង។ គាត់បានទៅលេង លោក Anand Panyarachun នៅផ្ទះរបស់គាត់ ហើយបានជួប Somchai Wongsawat នៅឈៀងម៉ៃ ថែមទៀត៕
ប្រែសម្រួលៈ ណៃ តុលា
