បរទេស៖ អ្នកនាំពាក្យគណបក្សកាន់អំណាចប៉ូឡូញ បានឲ្យដឹងថា ប៉ូឡូញកំពុងពិចារណាលើការដាក់ការគ្រប់គ្រងព្រំដែនជាមួយប្រទេសផ្សេងទៀតរួមទាំងប្រទេសអាល្លឺម៉ង់ផងដែរ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក Rafal Bochenek អ្នកនាំពាក្យគណបក្សច្បាប់ និងយុត្តិធម៌ បានប្រាប់ទូរទស្សន៍ TVP របស់ប្រទេសនេះថា “ខ្ញុំដឹងថា ការវិភាគប្រភេទនេះ កំពុងដំណើរការ ដោយសារប្រទេសអាល្លឺម៉ង់ ជារឿយៗជាគោលដៅ សម្រាប់ជនចំណាកស្រុកខុសច្បាប់”។
លោកបានបន្ថែមថា ប្រទេសប៉ូឡូញ ក៏មានការព្រួយបារម្ភអំពីជនចំណាកស្រុកមកប៉ូឡូញ ពីប្រទេសអាល្លឺម៉ង់។ លោកបានបន្តថា”យើងចង់ធានាសុវត្ថិភាពប៉ូល នេះជាអាទិភាពសម្រាប់យើង”។កាលពីឆ្នាំមុន ប្រទេសអាល្លឺម៉ង់ បានទទួលយកជនចំណាកស្រុកខុសច្បាប់ប្រហែល ១០ម៉ឺន នាក់ និងជិត ៧ម៉ឺននាក់នៅឆ្នាំនេះ។
ការកត់សម្គាល់របស់លោក បានកើតឡើងបន្ទាប់ពីនាយករដ្ឋមន្ត្រី Mateusz Morawiecki បានប្រាប់ការជួបជុំបោះឆ្នោតកាលពីថ្ងៃចន្ទថា លោកបានបញ្ជាឱ្យត្រួតពិនិត្យយានយន្តនៅព្រំដែនប៉ូឡូញ-ស្លូវ៉ាគី ដើម្បីបញ្ឈប់ជនចំណាកស្រុកមិនឱ្យឆ្លងកាត់ប្រទេសប៉ូឡូញ តាមផ្លូវរបស់ពួកគេទៅកាន់ប្រទេសអាល្លឺម៉ង់ តាមរយៈផ្លូវ ដែលហៅថា បាល់កង់ ។
ទោះបីជាប្រទេសទាំងនេះជាផ្នែកមួយនៃតំបន់ Schengen គ្មានព្រំដែនក៏ដោយ រដ្ឋមន្ត្រីមហាផ្ទៃអាល្លឺម៉ង់ Nancy Faeser បានឲ្យដឹងថា ប្រទេសអាល្លឺម៉ង់ នឹងពង្រឹងការគ្រប់គ្រងព្រំដែនកាន់តែខ្លាំងជាមួយប៉ូឡូញ និងសាធារណរដ្ឋឆេក ដើម្បីជួយប្រយុទ្ធប្រឆាំងនឹងការជួញដូរមនុស្ស៕ ប្រែសម្រួល ឈូក បូរ៉ា
