បរទេស ៖ ការផ្គត់ផ្គង់ ឧស្ម័នធម្មជាតិរាវ ឬដែលយើងហៅថាហ្គាស (LNG) របស់រុស្ស៊ី អាចនៅតែត្រូវបានដឹកជញ្ជូន ទៅកាន់ស្ថានីយស្តុក របស់ប្រទេសអាល្លឺម៉ង់ ទោះបីជាមានការសន្យាដោយក្រុមហ៊ុន Uniper ធំក៏ដោយ នេះបើយោងតាមនាយកប្រតិបត្តិ របស់ខ្លួនគឺលោក Michael Lewis ។
យោងតាមការចេញផ្សាយរបស់ RTលោកបាននិយាយ កាលពីថ្ងៃសៅរ៍នៅក្នុងបទសម្ភាសន៍ ជាមួយកាសែត Rheinische Post របស់ប្រទេសអាល្លឺម៉ង់ថា ប្រទេសរុស្ស៊ីនៅតែបន្តលក់ LNG ទៅកាន់ទីផ្សារពិភពលោក ។ អ្នកលក់ដុំ រួមទាំងក្រុមហ៊ុន Uniper មិនតែងតែដឹងពីប្រភពដើម នៃឧស្ម័ន ដែលបានទិញនោះដែរ ។
ក្រុមហ៊ុនបានបញ្ឈប់ការទិញឧស្ម័ន ពីរុស្ស៊ីនៅចុងខែសីហា ឆ្នាំ២០២២ បន្ទាប់ពីទីក្រុងប្រ៊ូសែល បានដាក់ទណ្ឌកម្មប្រឆាំងនឹង រុស្ស៊ីជុំវិញប្រតិបត្តិការយោធា នៅអ៊ុយក្រែន ។
គួរឲ្យដឹងដែរថា កាលពីខែកុម្ភៈ ក្រុមហ៊ុន Uniper បានប្រកាសពីការខាតបង់ចំនួន១៩,១ ពាន់លានអឺរ៉ូ ឬប្រមាណជា២០,៣ពាន់លានដុល្លារ សម្រាប់ឆ្នាំ ២០២២ ដោយលើកឡើងពីការបង្កកទាំងស្រុង នៃការផ្គត់ផ្គង់ឧស្ម័នរបស់រុស្ស៊ី ដែលជាហេតុផលចម្បង សម្រាប់ការធ្លាក់ចុះនេះ។
កន្លងមករដ្ឋាភិបាលអាល្លឺម៉ង់ បានរៀបចំខ្លួនបានល្អប្រសើរ សម្រាប់រដូវរងាខាងមុខតាំងតែពីជាងមួយឆ្នាំមុន ដោយសារកន្លែងស្តុកឧស្ម័ន របស់ប្រទេសមានពេញ៩៥ភាគរយនេះបើតាមលោក Lewis ដែលបានព្រមានអំពីហានិភ័យ ដែលអាចកើតមានឡើង ៕
ប្រែសម្រួល៖ស៊ុនលី
