បរទេស៖ មហាសេដ្ឋីគឺលោក Elon Musk បានផ្តល់យោបល់ថា សហភាពអឺរ៉ុប អាចប្រឈមមុខនឹងការរំពឹងទុក នៃការកើតសង្រ្គាមស៊ីវិល ដោយសារតែគោលនយោបាយស្វាគមន៍ជនអន្តោប្រវេសន៍របស់ខ្លួន។ កាលពីពីរសប្តាហ៍មុន លោកបានធ្វើទស្សនកិច្ចនៅព្រំដែនភាគខាងត្បូងសហរដ្ឋអាមេរិក ដោយបានចូលទៅក្នុងការជជែកដេញដោលយ៉ាងតឹងតែង អំពីអន្តោប្រវេសន៍ក្នុងប្រទេសកំណើតរបស់លោក។
យោងតាមសារព័ត៌មាន RT ចេញផ្សាយនៅថ្ងៃទី១១ ខែតុលា ឆ្នាំ២០២៣ បានឱ្យដឹងថា លោក Elon Musk បានអះអាងនៅក្នុងការបង្ហោះនៅលើ X (អតីត Twitter) កាលពីថ្ងៃពុធថា “ប្រសិនបើនិន្នាការបច្ចុប្បន្ននៅតែបន្ត សង្រ្គាមស៊ីវិលនៅអឺរ៉ុបគឺជៀសមិនរួច” ។
លោក Elon Musk បានឆ្លើយតបទៅនឹងខ្សែស្រលាយដោយអ្នកនិយាយតិះដៀលជនជាតិអង់គ្លេសកើតនៅទីក្រុងមូស្គូ និងជាអ្នកអត្ថាធិប្បាយនយោបាយលោក Konstantin Kisin ។ លោកបានបរិហារអ្វីដែលលោកហៅថា «អ្នកដែលបានរំលោភសេពសន្ថវៈ និងអំពើឃាតកម្មដោយអង្គការភេរវជនដែលត្រូវបានកំណត់ នៅពេលប៉ូលិសឈរមើលក្នុងទីក្រុងធំៗនៅអឺរ៉ុប»។
Kisin គឺសំដៅទៅលើបាតុកម្មគាំទ្រប៉ាឡេស្ទីន បន្ទាប់ពីការលុកលុយដ៏សាហាវដោយក្រុមហាម៉ាសចូលទៅក្នុងភាគខាងត្បូងអ៊ីស្រាអែល កាលពីសប្តាហ៍មុន។ អ្នកស្រុកមួយចំនួននៃប្រជាជាតិអឺរ៉ុប បានផ្តោតលើការថ្កោលទោសអ៊ីស្រាអែល ចំពោះការធ្វើបាបប្រជាជននៅតំបន់ West Bank និង Gaza ជាជាងថ្កោលទោសការសម្លាប់ និងការចាប់ជំរិតជនជាតិអ៊ីស្រាអែល ដោយចលនាសកម្មប្រយុទ្ធប៉ាឡេស្ទីន៕ ប្រែសម្រួលៈ ណៃ តុលា
