បរទេស៖ យោធាអ៊ីស្រាអែល បានជំរុញឱ្យមនុស្សជាង ១លាននាក់ ចាកចេញពីផ្ទះរបស់ពួកគេនៅក្នុងទីក្រុង ហ្គាហ្សា ហើយផ្លាស់ទីលំនៅទៅភាគខាងត្បូងជាបន្ទាន់ ដែលនេះជាទង្វើមួយដែលអង្គការសហប្រជាជាតិបាននិយាយថា នឹងបង្កឱ្យមាន “ផលវិបាកមនុស្សធម៌ដ៏មហន្តរាយ” ។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែតុលា ឆ្នាំ២០២៣ បានឱ្យដឹងថា កងកម្លាំងការពារអ៊ីស្រាអែល (IDF) បានចេញបញ្ជាជម្លៀសដោយហៅបទបញ្ជានេះថា ជា “ជំហានមនុស្សធម៌” ។ IDF មិនបាននិយាយពីកាលកំណត់ជាក់លាក់ណាមួយឡើយ ដោយអ្នកនាំពាក្យបានទទួលស្គាល់ថា វានឹងត្រូវការពេលខ្លះ។
យោធាបាននិយាយនៅក្នុងបណ្តាញសង្គម X ថា “IDF អំពាវនាវឱ្យប្រជាជនទាំងអស់នៃទីក្រុង ហ្គាហ្សា ជម្លៀសចេញពីផ្ទះរបស់ពួកគេដោយ ផ្លាស់ទីទៅភាគខាងត្បូងសម្រាប់ការការពារខ្លួន និងទៅតាំងទីលំនៅក្នុងតំបន់ភាគខាងត្បូងនៃទន្លេ ហ្គាហ្សា” ។ “ការជម្លៀសនេះគឺសម្រាប់សុវត្ថិភាពផ្ទាល់ខ្លួនរបស់អ្នក។ គេនឹងអាចត្រឡប់ទៅទីក្រុង ហ្គាហ្សា វិញបានលុះត្រាតែមានការជូនដំណឹងបញ្ជាក់ពីរឿងនេះ»។
ចំណែកការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ និងនាយកដ្ឋានសុវត្ថិភាព និងសន្តិសុខនៅហ្គាហ្សា (OCHA oPt) ត្រូវបានជូនដំណឹងនៅមុនពាក់កណ្តាលអធ្រាត្រម៉ោងក្នុងស្រុកថា “ប្រជាជនទាំងមូលនៃតំបន់ហ្គាហ្សាភាគខាងជើងនៃវ៉ាឌីហ្គាហ្សាគួរតែផ្លាស់ទីលំនៅទៅភាគខាងត្បូងហ្គាហ្សាក្នុងរយៈពេល ២៤ ម៉ោងបន្ទាប់ នេះបើតាមអ្នកនាំពាក្យអង្គការសហប្រជាជាតិលោក Stephane Dujarric បាននិយាយនៅក្នុងសេចក្តីថ្លែងការណ៍មួយទៅកាន់ប្រព័ន្ធផ្សព្វផ្សាយជាច្រើននៅព្រឹកថ្ងៃសុក្រ៕
ប្រែសម្រួលៈ ណៃ តុលា
