ភ្ញៀវទេសចរចិន បាត់ទំនុកចិត្តលើប្រទេសថៃ បន្ទាប់ពីហេតុការណ៍បាញ់ សម្លាប់មនុស្សក្នុងផ្សារទំនើប កណ្តាលក្រុងបាងកក

បរទេស៖ ម្ចាស់សណ្ឋាគារ និងសហគ្រិនទេសចរណ៍នៅទីក្រុងឈៀងម៉ៃ ប្រទេសថៃ បានអំពាវនាវឱ្យរដ្ឋាភិបាលបង្កើនការគ្រប់គ្រងកាំភ្លើង ដើម្បីធានាសុវត្ថិភាពសម្រាប់វិស័យទេសចរណ៍ បន្ទាប់ពីឧប្បត្តិហេតុបាញ់ប្រហារនៅផ្សារទំនើប Siam Paragon កាលពីថ្ងៃទី៣ ខែតុលា ដែលបានប៉ះពាល់ដល់ទំនុកចិត្តរបស់អ្នកធ្វើដំណើរចិននៅក្នុងប្រទេសថៃ។

យោងតាមសារព័ត៌មាន Bangkok Post ចេញផ្សាយនៅថ្ងៃទី១៧ ខែតុលា ឆ្នាំ២០២៣ បានឱ្យដឹងថា អ្នកទេសចរប្រហែល ៦០.០០០ នាក់បានលុបចោលការធ្វើដំណើររបស់ពួកគេទៅកាន់ប្រទេសថៃបន្ទាប់ពីការបាញ់ប្រហារនៅផ្សារទំនើប Siam Paragon ដែលបានសម្លាប់មនុស្ស ៣ នាក់ រួមទាំងម្នាក់ជាទេសចរចិន និងរបួស៤នាក់។

ទិន្នន័យអាកាសយានដ្ឋាននៃប្រទេសថៃបានបង្ហាញថា ចំនួនអ្នកមកដល់របស់ចិនបានធ្លាក់ចុះ ៩,២ភាគរយ ពី ៦៥០.០០០នាក់ មក ៥៩០.០០០ នាក់បន្ទាប់ពីឧប្បត្តិហេតុបាញ់ប្រហារនេះ។

ប្រទេសចិនគឺជាទីផ្សារទេសចរណ៍ក្រៅប្រទេសដ៏ធំបំផុតរបស់ប្រទេសថៃមុនពេលជំងឺរាតត្បាតរាតត្បាតដោយមានជនជាតិចិនប្រហែល ១១ លាននាក់បានមកដល់ក្នុងឆ្នាំ ២០១៩ ។

ទោះជាយ៉ាងណាក៏ដោយ អាជ្ញាធរទេសចរណ៍រំពឹងថា ចំនួននេះតិចជាងពាក់កណ្តាល ឬប្រហែល ៥លាននាក់នឹងមកទស្សនាប្រទេសនៅឆ្នាំនេះ។

ឈៀងម៉ៃទទួលបានភ្ញៀវទេសចរណ៍ចិនច្រើនជាងគេ ដូច្នេះហើយក្រុមហ៊ុនអាកាសចរណ៍ចិនចំនួន ៥ បានបើកជើងហោះហើរទៅកាន់ខេត្តនេះ។ ក្រុមហ៊ុនទាំងនោះ រួមមាន ក្រុមហ៊ុនអាកាសចរណ៍ Juneyao, Spring Airlines, China Eastern Airlines, Sichuan Airlines និង Air China ៕

ប្រែសម្រួលៈ ណៃ តុលា