វ៉ាស៊ីនតោន៖ មន្ត្រីសេតវិមានបានឲ្យដឹងថា សហរដ្ឋអាមេរិក និងចិន មានកិច្ចព្រមព្រៀងជាមូលដ្ឋានមួយ ក្នុងការរៀបចំកិច្ចប្រជុំកំពូលនៅចុងខែនេះ រវាងប្រធានាធិបតីនៃប្រទេសទាំងពីរ ខណៈពេលដែលកំពុងស្វែងរកការធានាថា មិនមានការភ័ន្តច្រឡំអំពីផែនការ ជាមួយទីក្រុងប៉េកាំង។
លោកស្រី Emilie Simons អនុលេខាផ្នែកសារព័ត៌មានរបស់សេតវិមានបានឲ្យដឹងថា “ខ្ញុំមិនចង់ទៅមុនកន្លែង ដែលយើងស្ថិតនៅក្នុង ដំណើរការរៀបចំផែនការភស្តុភារទេ ប៉ុន្តែយើងបានយល់ព្រមលើកិច្ចប្រជុំជាគោលការណ៍” យើងកំពុងធ្វើការយ៉ាងជិតស្និទ្ធជាមួយចិន ដើម្បីដាក់ផែនការទាំងនោះរួមគ្នា”។
ក្នុងការនិយាយទៅកាន់ អ្នកសារព័ត៌មាននៅលើយន្តហោះ Air Force One ក្នុងពេលធ្វើដំណើរជាមួយប្រធានាធិបតីអាមេរិកលោក ចូ បៃដិន ទៅកាន់រដ្ឋ Minnesota លោកស្រីក៏បានឲ្យដឹងផងដែរថា “យើងទាំងអស់គ្នានៅលើទំព័រតែមួយ” ហើយប្រទេសទាំងពីរបាន “ទទួលស្គាល់ជាទៀងទាត់ នូវសារៈសំខាន់នៃបណ្តាញអ្នកដឹកនាំ ទៅអ្នកដឹកនាំក្នុងការគ្រប់គ្រងបញ្ហានេះ និង ទំនាក់ទំនងទ្វេភាគី”។
កាលពីសប្តាហ៍មុន អ្នកការទូតកំពូលរបស់ប្រទេសចិន លោក វ៉ាង យី បានជួបជាមួយលោក បៃដិន ទីប្រឹក្សាសន្តិសុខជាតិកំពូលរបស់លោក Jake Sullivan និងរដ្ឋលេខាធិការ Antony Blinken នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
បន្ទាប់ពីកិច្ចប្រជុំជាបន្តបន្ទាប់ ដែលមានរយៈពេលប្រហែល ១០ម៉ោងក្នុងរយៈពេលពីរថ្ងៃ ភាគីទាំងពីរបាននិយាយថា ពួកគេបានយល់ព្រមធ្វើការឆ្ពោះទៅ រកកិច្ចប្រជុំកំពូលរវាងលោក បៃដិន និងប្រធានាធិបតីចិនលោក ស៊ី ជីនពីង នៅលើជ្រុងនៃកិច្ចប្រជុំមេដឹកនាំនៃ វេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក នៅពាក់កណ្តាលខែវិច្ឆិកា នៅសាន់ហ្វ្រាន់ស៊ីស្កូ។
ទោះបីជាយ៉ាងណាក៏ដោយ បើប្រៀបធៀបជាមួយសមភាគីអាមេរិករបស់ពួកគេ មន្ត្រីចិនរួមទាំងលោក វ៉ាង យី បានប្រុងប្រយ័ត្នជាងមុនក្នុងការ ជ្រើសរើសពាក្យរបស់ពួកគេ អំពីកិច្ចពិភាក្សាទល់មុខគ្នា ដែលបានគ្រោងទុករវាងប្រធានាធិបតីទាំងពីរ៕
ប្រែសម្រួល ឈូក បូរ៉ា
