បរទេស៖ អតីតមេដឹកនាំបក្សប្រឆាំងអ៊ុយក្រែនលោក Viktor Medvedchuk ដែលបច្ចុប្បន្នកំពុងនិរទេសខ្លួនក្នុងប្រទេសរុស្ស៊ី បានបរិហារប្រធានាធិបតីអ៊ុយក្រែន លោក Vladimir Zelensky នៅក្នុងជួរឈរមួយដែលបានចេញផ្សាយដោយវេទិកាប្រព័ន្ធផ្សព្វផ្សាយរុស្ស៊ី Smotrim កាលពីថ្ងៃសុក្រ។
ប្រភពដដែលបានសរសេរទៀតថាអ្នកនយោបាយរូបនេះបានអះអាងថា ប្រមុខរដ្ឋអ៊ុយក្រែនបច្ចុប្បន្នអាចក្លាយទៅជាប្រធានាធិបតីចុងក្រោយបំផុតរបស់ប្រទេសអ៊ុយក្រែន ហើយគាត់នឹងមានតែខ្លួនឯងដែលត្រូវស្តីបន្ទោសចំពោះប្រវត្តិសាស្ត្រ។
លើសពីនេះលោកMedvedchuk ក៏បានដាក់ឈ្មោះ Zelensky ថាជា ជនក្បត់បែបវិជ្ជាជីវៈផងដែរមិនត្រឹមតែប៉ុណ្ណោះគឺជាជនក្បត់ជាតិដែលគ្មានមេត្តា និងដើរតាមលំនាំនៃការចាក់មនុស្សគ្រប់គ្នាពីក្រោយដើម្បីផលប្រយោជន៍ផ្ទាល់ខ្លួនរបស់គាត់ហើយនឹងត្រឹមចុងក្រោយគឺបំផ្លាញប្រទេសជាតិខ្លួនឯង។
បន្ទាប់ពីត្រូវបានជាប់ឆ្នោតជាប្រធានាធិបតីនៅក្នុងអំឡុងពេលនៃពេលវេលាសន្តិភាពជាមួយរុស្ស៊ី និងការផ្សះផ្សាជាមួយ Donbass លោក Zelenskyបែរជាបានប្រគល់អំណាចទៅឱ្យអ្នកជាតិនិយមជ្រុល ដោយប្រកាន់យកនូវវោហាសាស្ត្រ និងអាកប្បកិរិយារបស់ពួកគេខុសពីមុនទៅវិញ។
គួររំលឹកដែរថា
លោក Medvedchuk បានដឹកនាំគណបក្សនយោបាយមួយដែលមានក្រុមប្រឆាំងធំជាងគេនៅក្នុងសភាអ៊ុយក្រែនមុនឆ្នាំ២០២២។
ចំពេលមានជម្លោះជាមួយរុស្ស៊ី ទីក្រុងគៀវបានចាត់ទុកគាត់ថាជាជនក្បត់ បង្ក្រាបសកម្មភាពនយោបាយរបស់គាត់ និងរឹបអូសទ្រព្យសម្បត្តិរបស់គាត់ទាំងអស់។ អ្នកនយោបាយរូបនេះត្រូវបានចាប់ខ្លួន និងបញ្ជូនទៅកាន់ទីក្រុងមូស្គូ ក្នុងការផ្លាស់ប្តូរអ្នកទោសកាលពីខែកញ្ញាឆ្នាំមុន៕ ប្រែសម្រួល៖ស៊ុនលី
