ហ្គាហ្សា៖ លោក Milan Brglez សមាជិកសភាអឺរ៉ុបរបស់ស្លូវេនី បានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃសុក្រថា សហភាពអឺរ៉ុប បាននិងកំពុងធ្វើសកម្មភាពលាក់ពុតទាក់ទងនឹងជម្លោះអ៊ីស្រាអែល និងក្រុមហាម៉ាស ហើយគួរតែធ្វើបន្ថែមទៀត ដើម្បីជួយសម្រួលដល់សន្តិភាពយូរអង្វែង។
យោងតាម STA Brglez បានរិះគន់សហភាពអឺរ៉ុប សម្រាប់ការគាំទ្រដោយគ្មានលក្ខខណ្ឌសម្រាប់អ៊ីស្រាអែល ប៉ុន្តែបានខិតខំប្រឹងប្រែងតិចតួចបំផុតដើម្បីជួយប៉ាឡេស្ទីន។ Brglez គឺជាសមាជិកនៃក្រុមសង្គមនិយម & ប្រជាធិបតេយ្យរបស់ EP និងជាសមាជិកនៃគណបក្សសង្គមប្រជាធិបតេយ្យស្លូវេនី ដែលជាគណបក្សវ័យក្មេងនៅក្នុងសម្ព័ន្ធរដ្ឋាភិបាលរបស់ប្រទេសស្លូវេនី។
លោកត្រូវបានគេដកស្រង់សម្តីដោយថា ស្លូវេនី “ត្រូវតែទប់ទល់នឹងវិធីសាស្រ្តបែបនេះគ្រប់មធ្យោបាយ ហើយតែងតែប្រកាន់ខ្ជាប់នូវច្បាប់អន្តរជាតិ និងមនុស្សធម៌ ដែលពិតជាច្បាស់លាស់នៅក្នុងករណីបែបនេះ”។
យោងតាម STA Brglez បានថ្កោលទោសអ្វីដែលលោកមើលឃើញថាជាការមិនចុះសម្រុងគ្នាទាក់ទងនឹងជម្លោះអ៊ីស្រាអែល និងហាម៉ាសរវាងប្រធានគណៈកម្មការអឺរ៉ុបលោកស្រី Ursula von der Leyen និងអ្នកតំណាងនៃ EP ដែលលោកបានលេីកឡេីងថា កំពុងបែងចែកប្លុកនិងមិនរួមចំណែកដល់ការបញ្ឈប់ការបាញ់ និងការស្វែងរកដំណោះស្រាយចំពោះវិបត្តិមនុស្សធម៌នៅហ្គាហ្សា។
ក្នុងពេលជាមួយគ្នានេះ Brglez បានស្វាគមន៍ការសម្រេចចិត្តរបស់ស្លូវេនី ក្នុងការគាំទ្រដំណោះស្រាយរបស់មហាសន្និបាតអង្គការសហប្រជាជាតិកាលពីសប្តាហ៍មុន ដែលបានអំពាវនាវឱ្យមានការឈប់បាញ់មនុស្សធម៌នៅក្នុងតំបន់ហ្គាហ្សា៕ ប្រែសម្រួល ឈូក បូរ៉ា
