បរទេស៖ មន្ត្រីប៉ូលិសជាន់ខ្ពស់ម្នាក់បានច្រានចោលលទ្ធភាពដែលប៉ូលិសរបស់ចិន ដើរល្បាតទីក្រុងទេសចរណ៍សំខាន់ៗក្នុងប្រទេសថៃ ដើម្បីបង្កើនទំនុកចិត្តរបស់អ្នកធ្វើដំណើរចិន។
យោងតាមសារព័ត៌មាន The Nation របស់ថៃចេញផ្សាយកាលពីថ្ងៃទី១៣ ខែវិច្ឆិកា ឆ្នាំ២០២៣ បានឱ្យដឹងថា មន្ត្រីដែលសុំមិនបញ្ចេញឈ្មោះបានប្រាប់កាសែត The Nation កាលពីថ្ងៃចន្ទថា សំណើដែលលើកឡើងដោយប្រធានផ្នែកទេសចរណ៍ថៃ (TAT) លោក Thapanee Kiatphaibool គឺមិនអាចអនុវត្តបានទេ ដោយសារការរឹតបន្តឹងនៃច្បាប់សន្តិសុខថៃ។
មន្រ្តីរូបនោះថា “ខ្ញុំជឿថាគម្រោងនេះមិនអាចធ្វើទៅរួចទេ ព្រោះច្បាប់ថៃមិនអនុញ្ញាតឱ្យមន្ត្រីបរទេសចូលរួមប្រតិបត្តិការរបស់ប៉ូលីសថៃ។ ប្រភពបានបន្ថែមថា វានឹងបំពានច្បាប់យ៉ាងច្បាស់។
ប្រធាន TAT បានលើកឡើងពីគំនិតនេះនៅក្នុងកិច្ចប្រជុំជាមួយនាយករដ្ឋមន្ត្រីថៃលោក សេដ្ឋា ថាវីស៊ីន កាលពីថ្ងៃអាទិត្យ។ នាយករដ្ឋមន្ត្រីបានកោះហៅលោកស្រី រួមជាមួយនឹងតំណាងការិយាល័យនគរបាលទេសចរណ៍ និងការិយាល័យស៊ើបអង្កេតកណ្តាល ដើម្បីពិភាក្សាអំពីវិធីជំរុញការមកដល់របស់ភ្ញៀវចិន និងប្រឆាំងព័ត៌មានក្លែងក្លាយដែលកំពុងធ្វើជុំវិញ៕ ប្រែសម្រួលៈ ណៃ តុលា
