យូអិន៖ អគ្គលេខាធិការអង្គការសហប្រជាជាតិលោក Antonio Guterres បានព្យាករណ៍ថាអាជ្ញាធរប៉ាឡេស្ទីន ដែលបានពង្រឹងនឹងទទួលបន្ទុកនៅហ្គាហ្សា បន្ទាប់ពីវិបត្តិបច្ចុប្បន្ន ហើយអ្នកលេងអន្តរជាតិនឹងធ្វើការ ឆ្ពោះទៅរកដំណោះស្រាយរដ្ឋពីរ។
នៅពេលសួរអំពីចក្ខុវិស័យរបស់លោក “សម្រាប់ថ្ងៃក្រោយ” នៅតំបន់ហ្គាហ្សា លោក Guterres បានឧ្យដឹងថា វាជារឿងសំខាន់ដើម្បីអាចផ្លាស់ប្តូរ សោកនាដកម្មនេះទៅជាឱកាស សម្រាប់ការដោះស្រាយរយៈពេលវែង។
លោកបានលើកឡើងថា “ហើយដើម្បីឱ្យវាអាចទៅរួច វាចាំបាច់ណាស់ ដែលបន្ទាប់ពីសង្រ្គាមយើងផ្លាស់ទីក្នុងវិធី ដែលបានកំណត់ និងមិនអាចត្រឡប់វិញបាន ទៅជាដំណោះស្រាយរដ្ឋពីរ” ។
លោកបានបន្ដថា “ខ្ញុំជឿថា វានឹងមានសារៈសំខាន់ក្នុងការមានអាជ្ញាធរប៉ាឡេស្ទីន ដែលបានពង្រឹងដោយទទួលបន្ទុកនៅហ្គាហ្សា។ ខ្ញុំយល់ថា អាជ្ញាធរប៉ាឡេស្ទីន មិនអាចមកជាមួយរថក្រោះរបស់អ៊ីស្រាអែល នៅតំបន់ហ្គាហ្សាបានទេ ដែលមានន័យថាសហគមន៍អន្តរជាតិ ចាំបាច់ត្រូវឈានទៅសម័យអន្តរកាលមួយ ខ្ញុំមិនគិតថាអាណាព្យាបាលរបស់ អង្គការសហប្រជាជាតិនៅហ្គាហ្សា គឺជាដំណោះស្រាយទេ។ ខ្ញុំគិតថាយើងត្រូវការវិធីសាស្រ្តពហុភាគី ដែលប្រទេសផ្សេងគ្នា អង្គភាពផ្សេងគ្នានឹងសហការ”។
សម្រាប់អ៊ីស្រាអែល សហរដ្ឋអាមេរិកគឺជាអ្នកធានា ដ៏សំខាន់នៃសន្តិសុខរបស់ខ្លួន សម្រាប់ប៉ាឡេស្ទីន ប្រទេសជិតខាង និងប្រទេសអារ៉ាប់នៃតំបន់គឺជាកត្តាសំខាន់ ដូច្នេះគ្រប់ៗគ្នាត្រូវរួមគ្នាបង្កើតលក្ខខណ្ឌ សម្រាប់ការផ្លាស់ប្តូរ ដោយអនុញ្ញាតឱ្យអាជ្ញាធរប៉ាឡេស្ទីនពង្រឹង ទទួលបន្ទុកនៅហ្គាហ្សា ហើយបន្ទាប់មកផ្អែកលើនោះ ដើម្បីឈានទៅដល់ការប្តេជ្ញាចិត្ត និងមិនអាចត្រឡប់វិញបាន ចំពោះដំណោះស្រាយរដ្ឋពីរដោយផ្អែកលើ គោលការណ៍ដែលត្រូវបានបង្កើតឡើង យ៉ាងទូលំទូលាយដោយសហគមន៍អន្តរជាតិ៕
ប្រែសម្រួល ឈូក បូរ៉ា
