បរទេស៖ យោងតាមរដ្ឋមន្ត្រីការបរទេសហុងគ្រី លោក Peter Szijjarto បានឲ្យដឹងថា រដ្ឋមន្ត្រីការបរទេសជាច្រើនរូប នៅក្នុងកិច្ចប្រជុំរបស់អង្គការណាតូក្នុងសប្តាហ៍នេះ នៅទីក្រុងប្រ៊ុសែល បានទទួលស្គាល់ថា ប្រតិបត្តការវាយលុករបស់អ៊ុយក្រែន ដែលរំពឹងទុកយ៉ាងខ្លាំងនោះ បានបរាជ័យរួចទៅហើយ។
លោកបាននិយាយថា ផែនការដើមគឺសម្រាប់អ៊ុយក្រែន ដើម្បីកម្ចាត់រុស្ស៊ីនៅសមរភូមិ ដែលបង្កឲ្យមានផលវិបាកនយោបាយ នៅក្រុងម៉ូស្គូខ្ញុំគិតថាថ្ងៃនេះ មនុស្សគ្រប់គ្នាអាចមើលឃើញ – ទោះបីជាពួកគេប្រហែល ជាមិនទទួលស្គាល់វាក៏ដោយថា ផែនការនេះពិតជាបានបរាជ័យ ។
លោកបានលើកឡើងទៀតថា៖ គោលដៅ និងក្តីសង្ឃឹមនៃការវាយលុករបស់ អ៊ុយក្រែនត្រូវបានធ្លាក់ចុះ ពីព្រោះមិនមានការផ្លាស់ប្តូរ អ្វីធំដុំនៅលើសមរភូមិ និងគ្មានការទម្លាយណាមួយឡើយ ហើយវាបានទទួលស្គាល់ដោយមនុស្សជាច្រើន នៅកិច្ចប្រជុំណាតូរួចទៅហើយដែរ។
គួរឲ្យដឹងដែរថានៅក្នុងកិច្ចប្រជុំ របស់រដ្ឋមន្ត្រីការបរទេសណាតូ អគ្គលេខាធិការលោក Jens Stoltenberg បានជំរុញឱ្យរដ្ឋជាសមាជិករក្សាផ្លូវ ក្នុងការបំពាក់អាវុធអ៊ុយក្រែនបន្តទៀត ដោយទទូចថានេះក៏និយាយអំពី ផលប្រយោជន៍សន្តិសុខរបស់ យើងទាំងអស់គ្នាផងដែរ៕
ប្រែសម្រួល៖ ស៊ុន លី
