បរទេស៖ អ្នកនាំពាក្យក្រសួងការបរទេសចិន លោក Wang Wenbin បាននិយាយថា បញ្ហាកោះតៃវ៉ាន់ គឺជាកិច្ចការផ្ទៃក្នុង របស់ចិនទាំងស្រុង។ លោកបានសង្កត់ធ្ងន់ថា គន្លឹះនៃស្ថិរភាពនិងសន្តិភាព នៅច្រកសមុទ្រតៃវ៉ាន់ គឺ«គោលការណ៍ចិនតែមួយ» ។
យោងតាមសារព័ត៌មាន RT ចេញផ្សាយនៅថ្ងៃទី៥ ខែធ្នូ ឆ្នាំ២០២៣ បានឱ្យដឹងថា ក្នុងអំឡុងសន្និសីទសារព័ត៌មាន ជាទៀងទាត់កាលពីថ្ងៃចន្ទ មន្ត្រីរូបនេះបានអត្ថាធិប្បាយ លើសេចក្តីថ្លែងការណ៍របស់រដ្ឋមន្ត្រីការបរទេសបារាំង លោកស្រី Catherine Colonna ថា “ភាពស្ងប់ស្ងាត់ និងស្ថិរភាព ត្រូវតែមាននៅក្នុងច្រកសមុទ្រតៃវ៉ាន់ ហើយប្រាកដណាស់ថា ពិភពលោកមិនត្រូវការវិបត្តិថ្មីនោះទេ” ។
ពាក្យសម្ដីរបស់នាងបានកើតឡើងចំពេល មានសេចក្តីរាយការណ៍ថា អូស្ត្រាលីបានចោទប្រកាន់ចិនថា បានបង្ករបួសស្នាមលើអ្នកមុជទឹក ជើងទឹក របស់ខ្លួនក្នុងអំឡុងពេលប្រតិបត្តិការក្នុងដែនទឹក អន្តរជាតិ កាលពីខែវិច្ឆិកា ។ ទីក្រុងកង់បេរ៉ាបានអះអាងថា នាវាចម្បាំងចិនបានបញ្ចេញរលកសូណា ដ៏គ្រោះថ្នាក់នៅជិត អ្នកមុជទឹកអូស្ត្រាលី បើទោះបីជាមានការព្រមានម្តងហើយម្តងទៀតក៏ដោយ។ ទីក្រុងប៉េកាំងបានបដិសេធរាល់ការចោទប្រកាន់ ដោយហៅវាថា “គ្មានមូលដ្ឋានទាំងស្រុង” ។
លោក Wang បានសំដៅទៅលើការឆ្លើយតបពីមុនរបស់ប្រទេសចិន ដោយលើកឡើង ពីអ្នកនាំពាក្យការិយាល័យកិច្ចការតៃវ៉ាន់របស់ក្រុមប្រឹក្សារដ្ឋចិន លោក Chen Binhua នៅក្នុងសេចក្តីថ្លែងការណ៍ របស់លោកកាលពីសប្តាហ៍មុនថា “ឯករាជ្យភាពកោះតៃវ៉ាន់ មានន័យថាសង្រ្គាម” ខណៈដែល សង្កត់ធ្ងន់ថា “យុថ្កាដ៏រឹងមាំសម្រាប់សន្តិភាព និងស្ថិរភាពឆ្លងកាត់ច្រកសមុទ្រគឺ គោលការណ៍ចិនតែមួយ”។
លោក Wang បានបន្ថែមថា “យើងសង្ឃឹមថា ភាគីពាក់ព័ន្ធនឹងប្រកាន់ខ្ជាប់ នូវគោលការណ៍ចិនតែមួយ ឈរយ៉ាងរឹងមាំជាមួយប្រទេសចិន ប្រឆាំងនឹងឯករាជ្យភាពរបស់តៃវ៉ាន់ និងការពារសន្តិភាព និងស្ថិរភាពនៅច្រកសមុទ្រតៃវ៉ាន់” ៕
ប្រែសម្រួលៈ ណៃ តុលា
