ពីថ្ងៃទី១២ ដល់ថ្ងៃទី១៣ ខែធ្នូ ឆ្នាំ២០២៣ តបតាមការអញ្ជើញរបស់លោកNguyen Phu Trọng អគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តវៀតណាម និងលោក Vo Van Thuong ប្រធានរដ្ឋ នៃប្រទេសវៀតណាម លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន និងជាប្រធានរដ្ឋចិនបានបំពេញទស្សនកិច្ចផ្លូវរដ្ឋនៅប្រទេសវៀតណាម ។ បន្ទាប់ពីបញ្ចប់ដំណើរទស្សនកិច្ចលើកនេះ លោក Wang Yi សមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនីស្តចិននិងជារដ្ឋមន្ត្រីការបរទេសចិន បានឧទ្ទេសនាមអំពីសភាពការណ៍ដំណើរទស្សនកិច្ច លើកនេះទៅកាន់អ្នកសារព័ត៌មានដែលបានអមដំណើរទស្សនកិច្ច ។
លោក Wang Yi បានថ្លែងថា ដំណើរទស្សនកិច្ចផ្លូវរដ្ឋនៅវៀតណាមរបស់លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន និងជាប្រធានរដ្ឋចិនទទួលបានភាពជោគជ័យដោយគាប់ប្រសើរនិងមានសារសំខាន់ជាប្រវតិ្តសាស្ត្រ ហើយបានក្លាយជានិមិត្តសញ្ញាថ្មីនៃទំនាក់ទំនងរវាងបក្សនិងរដ្ឋ នៃប្រទេសទាំងពីរចិននិងវៀតណាម ។
ទីមួយ ទំនាក់ទំនងរវាងចិននិងវៀតណាមបានឡើងដល់កម្រិតថ្មី អគ្គលេខាធិការបក្សទាំងពីររូបបានកំណត់ទិសដៅថ្មី នៃទំនាក់ទំនងរវាងបក្សនិងរដ្ឋ នៃប្រទេសទាំងពីរ ហើយបានប្រកាសថា នឹងចាប់ដៃគ្នាកសាងសហគមន៍រួមវាសនារវាងចិននិងវៀតណាម ប្រកបដោយអត្ថន័យជាយុទ្ធសាស្ត្រ លើមូលដ្ឋានធ្វើឱ្យស៊ីជម្រៅនូវទំនាក់ទំនង ភាពជាដៃគូសហប្រតិបតិ្តការយុទ្ធសាស្ត្រគ្រប់ជ្រុងជ្រោយ បានជាទំនាក់ទំនងរវាងចិននិងវៀតណាម បានឡើងដល់កម្រិតថ្មី ។
ទីពីរ កិច្ចសហប្រតិបតិ្តការជាក់ស្តែងទទួលបានសមិទ្ធផលថ្មី ក្នុងអំឡុងពេលដំណើរទស្សនកិច្ចលើកនេះ ភាគីទាំងពីរបានចុះហត្ថលេខាលើកិច្ចព្រមព្រៀងសហប្រតិបតិ្តការចំនួនជាង៣០ច្បាប់ ដែលគ្របដណ្តប់គ្រប់វិស័យ ដូចជា “ខ្សែក្រវាត់និងផ្លូវ” កិច្ចសហប្រតិបតិ្តការខាងការអភិវឌ្ឍ សេដ្ឋកិច្ចឌីជីថល ការអភិវឌ្ឍបៃតង គមនាគមន៍និងដឹកជញ្ជូន ការត្រួតពិនិត្យនិងចត្តាឡីស័ក កិច្ចសហប្រតិបតិ្តការសន្តិសុខខាងការពារជាតិនិងការអនុវត្តច្បាប់ និងកិច្ចសហប្រតិបតិ្តការលើសមុទ្រជាដើម ដែលបានត្រួសត្រាយវិសាលភាពនិងភាពស៊ីជម្រៅ នៃទំនាក់ទំនងរវាងចិននិងវៀតណាម ។
ទីបី ចារទំព័រថ្មីដើម្បីបន្តពង្រឹងនិងពង្រីកចំណងមិត្តភាពប្រពៃណី ក្នុងអំឡុងពេលដំណើរទស្សនកិច្ចលើកនេះ លោកអគ្គលេខាធិការបក្ស Xi Jinping និងអ្នកដឹកនាំនៃប្រទេសវៀតណាមបានគូសបញ្ជាក់សារចុះសារឡើងពីសារសំខាន់ នៃការពង្រឹងនិងពង្រីកចំណងមិត្តភាពប្រពៃណីក្នុងបរិបទថ្មី ។ លោក Xi Jinping បានលើកឡើងថា កិច្ចសហប្រតិបតិ្តការរវាងចិន និងវៀតណាម គួរតែផ្តោតសំខាន់ទៅលើវិស័យជីវភាពរស់នៅរបស់ប្រជាជនថែមទៀត ជាពិសេសគឺត្រូវបង្កើនកិច្ចសហប្រតិបតិ្តការលើវិស័យយុវជននិងតំបន់ជាដើម បង្កើនការទទួលស្គាល់របស់ប្រជាជន នៃប្រទេសទាំងពីរចំពោះសហគមន៍រួម វាសនារវាងចិននិងវៀតណាម ក៏ដូចជាពង្រឹងមូលដ្ឋាន នៃក្តីបំណងរបស់ប្រជាជននិងមូលដ្ឋានក្នុងសង្គមជាបន្តបន្ទាប់ផងដែរ ៕ អត្ថបទ និងរូបភាពដោយវិទ្យុមិត្តភាពកម្ពុជាចិន
