តូក្យូ៖ ការលេងល្បែងរបស់ នាយករដ្ឋមន្ត្រីជប៉ុនលោក ហ្វូមីអូ គីស៊ីដា ក្នុងការជំនួសរដ្ឋមន្ត្រីទាំងអស់ពីបក្សពួកដ៏ធំបំផុត នៅក្នុងគណបក្សប្រជាធិបតេយ្យសេរី ដែលកំពុងកាន់អំណាចរបស់លោក ជុំវិញរឿងអាស្រូវនៃការរៃអង្គាសថវិកា ផ្នែកនយោបាយអាចធ្វើឱ្យលោកកាន់តែលំបាក ក្នុងការគ្រប់គ្រងរដ្ឋាភិបាល។
លោក គីស៊ីដា មានគោលបំណងបញ្ចប់ការ មិនទុកចិត្តផ្នែកនយោបាយ ដោយមិនរាប់បញ្ចូលសមាជិកសភា ដែលជាកម្មសិទ្ធិរបស់បក្សពួក ដែលពីមុនដឹកនាំដោយអតីតនាយករដ្ឋមន្ត្រីលោក ស៊ិនហ្សូ អាបេ ប៉ុន្តែការប្រឆាំងពីក្រុមផ្ទៃក្នុងបក្ស ដ៏ធំបំផុតបានកាន់តែខ្លាំង ដែលអាចរារាំងលោកពីការសម្រេចបាន នូវគោលនយោបាយសំខាន់ៗ។
ការរិះគន់លើការដឹកនាំរបស់លោក គីស៊ីដា ជុំវិញរឿងអាស្រូវចុងក្រោយនេះ ក៏កំពុងកើនឡើងផងដែរ ដែលជំរុញឱ្យអ្នកនយោបាយកាន់តែច្រើននៅក្នុង LDP រក្សាគម្លាតពីរដ្ឋបាល ខណៈដែលមានការរំពឹងទុកយ៉ាងខ្លាំងថា លោកនឹងត្រូវបង្ខំឱ្យលាលែងពីដំណែងនៅនិទាឃរដូវ។
អ្នកវិភាគជាច្រើនបានឲ្យដឹងថា លោក គីស៊ីដា បានឈានដល់ដំណាក់កាលដ៏សំខាន់មួយ ដោយសារការវាយតម្លៃការអនុម័ត សម្រាប់គណៈរដ្ឋមន្ត្រីរបស់លោក នៅក្នុងការស្ទង់មតិប្រព័ន្ធផ្សព្វផ្សាយបានធ្លាក់ចុះ ដល់កម្រិតទាបបំផុតរបស់ពួកគេ ចាប់តាំងពីចូលកាន់តំណែងក្នុងខែតុលា ឆ្នាំ២០២១ ប្រហែលមួយឆ្នាំបន្ទាប់ពីលោក អាបេ ដែលជានាយករដ្ឋមន្ត្រី ដែលកាន់អំណាចយូរបំផុតរបស់ ប្រទេសជប៉ុនបានចុះចេញពីតំណែង។
ដោយទទួលបានអត្ថប្រយោជន៍ ពីអ្វីដែលអ្នកនយោបាយជប៉ុនហៅថា “កម្លាំងនៃលេខ” បក្សពួករបស់លោក អាបេ បានកាន់តំណែងរដ្ឋមន្ត្រីចំនួន៤ នៅក្នុងរដ្ឋាភិបាលរបស់លោក គីស៊ីដា មុនពេលការបោសសម្អាតសមាជិកបក្សពួកចុងក្រោយ រួមទាំងប្រធានគណៈរដ្ឋមន្ត្រី ខណៈដែលកំពុងកាន់តំណែងសំខាន់ៗ នៅក្នុងបក្សកាន់អំណាច ដូចជាប្រធានគោលនយោបាយជាដើម ៕
ប្រែសម្រួល ឈូក បូរ៉ា
