ម៉ូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានឲ្យដឹងថា អង្គការសន្ធិសញ្ញា អាត្លង់ទិកខាងជើង (NATO) បានបង្កើនវត្តមាន របស់ខ្លួនយ៉ាងខ្លាំង នៅអឺរ៉ុបខាងកើត ដូច្នេះកងកម្លាំងយុទ្ធសាស្ត្ររុស្ស៊ី នៅតែស្ថិតក្នុងការត្រៀម ខ្លួនប្រយុទ្ធកម្រិតខ្ពស់ ។
លោកប្រធានាធិបតី បានឲ្យដឹងក្នុងអំឡុងសុន្ទរកថា របស់លោកនៅឯកិច្ចប្រជុំពង្រីក នៃក្រសួងការពារជាតិរុស្ស៊ីថា សម្ព័ន្ធភាពអាត្លង់ទិកខាងជើង លែងព្យាយាមក្លែងបន្លំ “ធម្មជាតិឈ្លានពាន” របស់ខ្លួន នៅពីក្រោយ “ទម្រង់ការពារ” ហើយឯកសារគោលលទ្ធិ របស់សហរដ្ឋអាមេរិក បង្ហាញ យ៉ាងច្បាស់ថា ប្រទេសនេះកំពុងស្វែងរក ឧត្តមភាពជាសកលរបស់ខ្លួន។
លោកបានលើកឡើងថា ប្លុកនេះបាន “កើនឡើង យ៉ាងខ្លាំង” នូវសកម្មភាពយោធា របស់ខ្លួន ហើយបានដាក់ពង្រាយ កងកម្លាំង នៅជិតព្រំដែនរបស់រុស្ស៊ី ក៏ដូចជាបាននិងកំពុងបង្កើន វត្តមានកងទ័ពរបស់ខ្លួននៅអឺរ៉ុបខាងកើត និងកណ្តាល។
លោកបានបន្ដថា “ហ្វាំងឡង់ ត្រូវបានទាញចូលទៅក្នុងអង្គការណាតូរួចហើយ ហើយស៊ុយអែត គ្រោងនឹងចូលរួមដូចគ្នា” ដោយកត់សម្គាល់ថា នេះនឹងនាំឱ្យមានការពង្រីកបន្ថែមទៀតរបស់ប្លុកឆ្ពោះទៅកាន់ចុងបូព៌ា ដែលជាអ្វីដែលសម្ព័ន្ធភាពធ្លាប់បានសន្យាថា នឹងមិនធ្វើបែបនេះ។
លោក ពូទីន បានសង្កត់ធ្ងន់ថា អាវុធនុយក្លេអ៊ែរ របស់ប្រទេស គួរតែបន្តរក្សាកម្រិតខ្ពស់បំផុត នៃការត្រៀមខ្លួនប្រយុទ្ធចំពេលមានការប្រែប្រួល នៃការគំរាមកំហែងផ្នែកយោធា។
លោកបានបន្ដថាចំណែកនៃសព្វាវុធ និងឧបករណ៍ទំនើបៗនៅក្នុងផ្នែកនុយក្លេអ៊ែររបស់ប្រទេសឥឡូវនេះបានឈានដល់ ៩៥ភាគរយហើយ “ស្ទើរតែ ១០០ភាគរយនៅក្នុងផ្នែកកងទ័ពជើងទឹក” ។
លោក ពូទីន បានបន្ថែមថា មីស៊ីលចំនួន ១៥គ្រឿង ដែលមានមីស៊ីលអន្តរទ្វីប Yars និង Avangard នឹងចូលបំពេញកាតព្វកិច្ចប្រយុទ្ធនៅចុងឆ្នាំនេះ ក៏ដូចជានាវាផ្ទុកមីស៊ីល Tu-160M ចំនួន ៤គ្រឿងទៀតផងដែរ។
ចំពោះជម្លោះរុស្ស៊ី-អ៊ុយក្រែន លោកបានរំលឹកឡើងវិញថា ប្រទេសរបស់លោក នឹងបន្តអនុវត្តគោលដៅរបស់ខ្លួន ដែលបានកំណត់ក្នុងក្របខ័ណ្ឌ នៃប្រតិបត្តិការយោធាពិសេស ដោយបន្ថែមថា កងកម្លាំងរុស្ស៊ី បច្ចុប្បន្នកំពុងរក្សាគំនិតផ្តួចផ្តើម របស់ពួកគេនៅ លើសមរភូមិក្នុងប្រទេសអ៊ុយក្រែន៕
ប្រែសម្រួល ឈូក បូរ៉ា
