ដាម៉ាស់៖ ទីភ្នាក់ងារសារព័ត៌មានរដ្ឋ SANA បានរាយការណ៍ថា ក្បួនរថយន្តដឹកប្រេងចំនួន ៤៤ គ្រឿងដែលដឹកប្រេងពីទីវាលរបស់ស៊ីរី បានចាកចេញពីខេត្ត al-Hasakah ភាគឦសាននៃប្រទេសស៊ីរី ទៅកាន់មូលដ្ឋានទ័ពអាមេរិក នៅក្នុងប្រទេសអ៊ីរ៉ាក់ ដែលនៅជិតខាងនោះ កាលពីថ្ងៃព្រហស្បតិ៍។
យោងតាមប្រភពក្នុងស្រុកដែលដកស្រង់ដោយ SANA ក្បួនរថយន្តបានចាកចេញពីទីជនបទ Yarubiya នៅតាមព្រំដែនអ៊ីរ៉ាក់-ស៊ីរី តាមច្រក Mahmoudiya ដែលគ្មានការអនុញ្ញាត នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
ឧបទ្ទវហេតុនេះបានកើតឡើង ប៉ុន្មានថ្ងៃបន្ទាប់ពីកងកម្លាំង សហរដ្ឋអាមេរិកបានយកនាវាដឹកប្រេងចំនួន ៩៥ គ្រឿង និងរថយន្តដឹកគ្រាប់ធញ្ញជាតិ ពីភាគឦសាននៃប្រទេសស៊ីរី កាលពីថ្ងៃទី១៧ ខែធ្នូ។
រដ្ឋាភិបាលស៊ីរីបានចោទប្រកាន់ កងកម្លាំងអាមេរិកម្តងហើយម្តងទៀតថា បានលួចប្លន់ធនធានស៊ីរី ជាទង្វើមួយដែលធ្វើឲ្យកាន់តែធ្ងន់ធ្ងរ ដល់ការលំបាកសេដ្ឋកិច្ចរបស់ប្រទេស ដែលហែកហួរដោយសង្រ្គាម។
ប្រធានក្រុមហ៊ុនប្រេងស៊ីរី ដែលគ្រប់គ្រងដោយរដ្ឋាភិបាលលោក Farhan Jamil Abdullah បានឲ្យដឹងកាលពីខែកក្កដាថា ជាលទ្ធផលនៃទណ្ឌកម្មរបស់សហរដ្ឋអាមេរិក និងវត្តមានយោធានៅក្នុងប្រទេសស៊ីរី ការផលិតប្រេងបានថយចុះមកត្រឹម ១៥,០០០ពាន់បារ៉ែលក្នុងមួយថ្ងៃពី ៣៨៥,០០០បារ៉ែលក្នុងមួយថ្ងៃ មុនពេលមានវិបត្តិ ខណៈដែលការផលិតឧស្ម័ន បានធ្លាក់ចុះពី ៣០ លានម៉ែត្រគូបក្នុងមួយថ្ងៃមកត្រឹម ១០លានម៉ែត្រគូបក្នុងមួយថ្ងៃ។
លោកបានលើកឡើងថា រដ្ឋាភិបាលស៊ីរី បានបាត់បង់ការគ្រប់គ្រងលើ វិស័យថាមពលភាគច្រើន ដោយសារតែវត្តមានរបស់សហរដ្ឋអាមេរិក នៅក្នុងតំបន់សម្បូរប្រេងនៅភាគខាងជើង និងភាគខាងកើតប្រទេសស៊ីរី៕
ប្រែសម្រួល ឈូក បូរ៉ា
