តូក្យូ៖ យ៉ាងហោចណាស់មនុស្ស ១៣ នាក់ត្រូវបានបញ្ជាក់ថា បានស្លាប់នៅក្នុងការរញ្ជួយដីដ៏ខ្លាំងដែលបានវាយប្រហារឧបទ្វីបណូតូ និងតំបន់ជុំវិញនៅកណ្តាលប្រទេសជប៉ុន នៅថ្ងៃចូលឆ្នាំសកល ខណៈដែលមានរបាយការណ៍អំពីការខូចខាតកាន់តែច្រើន ហើយក្រុមអ្នកជួយសង្គ្រោះបាននិងកំពុងស្វែងរកអ្នករស់រានមានជីវិតនៅថ្ងៃអង្គារនេះ។
ការរញ្ជួយដីកម្រិត ៧,៦ រ៉ិចទ័រ បានបណ្តាលឱ្យមានការខូចខាតរចនាសម្ព័ន្ធ និងអគ្គីភ័យយ៉ាងទូលំទូលាយនៅក្នុងទីក្រុង Wajima ក្នុងខេត្ត Ishikawa ហើយអណ្តាតភ្លើងនៅតែឆាបឆេះនៅក្នុងតំបន់មួយចំនួន ខណៈដែលការបន្តការរញ្ជួយដី និងកម្ទេចថ្មនៅតាមដងផ្លូវបានរារាំងដល់ប្រតិបត្តិការជួយសង្គ្រោះ។
មន្ត្រីក្រុងបានឲ្យដឹងថា អ្នកស្លាប់រួមមានជនរងគ្រោះ៧នាក់នៅមន្ទីរពេទ្យក្រុង Wajima នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
ការព្រមានអំពីរលកយក្សស៊ូណាមិ ដែលគ្របដណ្តប់តំបន់យ៉ាងទូលំទូលាយតាមបណ្តោយសមុទ្រជប៉ុនត្រូវបានដកចេញនៅព្រឹកថ្ងៃអង្គារ បន្ទាប់ពីរលកខ្ពស់បំផុតប្រហែល ១,២ ម៉ែត្របានទៅដល់កំពង់ផែ Wajima កាលពីយប់ថ្ងៃចន្ទ បន្ទាប់ពីការរញ្ជួយនៅម៉ោង ៤ និង ១០នាទីរសៀល។
វីដេអូដែលថតដោយប្រព័ន្ធផ្សព្វផ្សាយសាធារណៈ NHK នៅព្រឹកថ្ងៃអង្គារនេះ បង្ហាញពីអគារកម្ពស់ ៧ជាន់បានដួលរលំនៅចំហៀង ហើយភ្លើងនៅតែកំពុងឆាបឆេះនៅតំបន់កណ្តាលនៃទីក្រុង Wajima ដែលត្រូវបានគេស្គាល់ថា ជាផ្សារលក់ដូរនៅពេលព្រឹក។
មន្ត្រីរដ្ឋបាលខេត្ត Ishikawa បានឲ្យដឹងថា អគ្គីភ័យបានលេបត្របាក់អគារជាង ២០០ ប៉ុន្តែឱកាសនៃការរីករាលដាលបន្ថែមទៀតគឺតិចតួច៕ ប្រែសម្រួល ឈូក បូរ៉ា
