យេរ៉ូសាឡឹម៖ ក្រុមសកម្មប្រយុទ្ធក្នុងប្រទេសស៊ីរី បានបាញ់កាំជ្រួចទៅលើការតាំងទីលំនៅរបស់អ៊ីស្រាអែលនៅតំបន់ Golan Heights ដែលកាន់កាប់កាលពីថ្ងៃចន្ទ ដោយជំរុញឱ្យមានការបាញ់ ផ្លោងសងសឹកពីយោធា អ៊ីស្រាអែល នេះបើយោងតាមប្រព័ន្ធផ្សព្វផ្សាយ គាំទ្ររដ្ឋាភិបាលស៊ីរី និង ជាអ្នកឃ្លាំមើលសង្គ្រាម។
វិទ្យុ Sham FM ដែលគាំទ្ររដ្ឋាភិបាលបានរាយការណ៍ថា ដីកសិកម្មក្នុងខេត្ត Daraa ជាប់ព្រំដែន ជាមួយនឹងតំបន់ Golan Heights បានទទួលការខូចខាត ដោយសារការបាញ់កាំភ្លើងធំរបស់អ៊ីស្រាអែល ដោយបន្ថែមការវាយប្រហារនេះ បានកើតឡើងជាការឆ្លើយតប ទៅនឹងការបាញ់មីស៊ីលចំនួន ៤គ្រាប់ពីប្រទេសស៊ីរី ឆ្ពោះទៅកាន់ការតាំងទីលំនៅ របស់អ៊ីស្រាអែលចំនួនពីរ។
របាយការណ៍បានឲ្យដឹងថា ដីស៊ីរីដែលបានកំណត់គោលដៅគឺនៅក្នុងអាង Yarmouk Basin ភាគខាងលិចនៃតំបន់ Daraa។ ប្រភពបានបន្ថែមថា កាំជ្រួចស៊ីរីបានធ្លាក់នៅជិតកន្លែងតាំងលំនៅរបស់អ៊ីស្រាអែលនៃ Eliad និង Avnei Etan។
ក្រុមឃ្លាំមើលសិទ្ធិមនុស្សស៊ីរី ដែលជាអ្នកឃ្លាំមើលសង្រ្គាម ដែលមានមូលដ្ឋាននៅចក្រភពអង់គ្លេស បានឲ្យដឹងថា “ក្រុមដែលគាំទ្រដោយអ៊ីរ៉ង់” បានបាញ់រ៉ុក្កែតឆ្ពោះ ទៅកាន់តំបន់ Golan Heights ដោយបង្កឱ្យមានការបាញ់ កាំភ្លើងធំរបស់អ៊ីស្រាអែល នៅក្នុងអាង Yarmouk ។
អ៊ីស្រាអែល បានបង្កើនការវាយប្រហារ តាមអាកាសលើគោលដៅ ស៊ីរីក្នុងប៉ុន្មានសប្តាហ៍ថ្មីៗនេះ ស្របពេលជាមួយនឹងយុទ្ធនាការយោធាកំពុងបន្តនៅតំបន់ហ្គាហ្សាស្ទ្រីប។ ក្រសួងការបរទេសស៊ីរី បានថ្កោលទោសការវាយប្រហារកាលពីថ្ងៃសុក្រ ដោយទាមទារឱ្យមានចំណាត់ការយ៉ាងម៉ឺងម៉ាត់ពីក្រុមប្រឹក្សាសន្តិសុខអង្គការសហប្រជាជាតិ ដើម្បីបញ្ឈប់ពួកគេ។
សង្រ្គាមស៊ីវិលរយៈពេល ១២ ឆ្នាំរបស់ប្រទេសស៊ីរី បានធ្វើឱ្យរដ្ឋាភិបាលរបស់ប្រធានាធិបតីលោក បាសា អាល់អាសាដ គាំទ្រដោយរុស្ស៊ី និងអ៊ីរ៉ង់ ប្រឆាំងនឹងក្រុមប្រឆាំងផ្សេងៗ ។ ទន្ទឹមនឹងនោះ អ៊ីស្រាអែល បានស្វែងរកជាយូរមកហើយ ដើម្បីការពារអ៊ីរ៉ង់ពីការបង្កើតវត្តមានយោធានៅក្នុងប្រទេសស៊ីរី ដោយធ្វើការវាយប្រហារ តាមអាកាសម្តងហើយម្តងទៀត ដើម្បីកំណត់គោលដៅ “ការផ្គត់ផ្គង់អាវុធរបស់អ៊ីរ៉ង់” ៕
ប្រែសម្រួល ឈូក បូរ៉ា
