បរទេស៖ យ៉ាងហោចណាស់មនុស្ស ៥៥ នាក់ត្រូវបានបញ្ជាក់ថា បានស្លាប់ដោយសារការរញ្ជួយដី ដ៏ខ្លាំងនៅថ្ងៃចូលឆ្នាំថ្មីដែលបានវាយប្រហារ នៅឆ្នេរសមុទ្រភាគខាងលិច នៃប្រទេសជប៉ុន។
យោងតាមសារព័ត៌មាន VOA ចេញផ្សាយនៅថ្ងៃទី២ ខែមករា ឆ្នាំ២០២៤ បានឱ្យដឹងថា ការខូចខាតជាច្រើនពីការរញ្ជួយដី ដែលទីភ្នាក់ងារឧតុនិយមជប៉ុនបាននិយាយថា មានកម្រិត ៧.៦រ៉ិចទ័រ បានកើតឡើងនៅក្នុងខេត្ត Ishikawa លើកោះ Honshu ។ ផ្ទះ និងអគាររាប់សិបខ្នងត្រូវបានបាក់រលំ ដោយមនុស្សជាច្រើនបានជាប់ក្នុងគំនរបាក់បែក។
ផ្លូវថ្នល់ត្រូវបានបំបែកជាបំណែកៗ ហើយផ្លូវរត់ក្នុងអាកាសយានដ្ឋាន ក្នុងតំបន់យ៉ាងហោចណាស់មួយបានប្រេះ ដែលធ្វើឱ្យមន្ត្រីសង្គ្រោះបន្ទាន់ ពិបាកវាយតម្លៃការខូចខាត។
ការរញ្ជួយដីនេះបានបង្កឱ្យ មានរលកយក្សស៊ូណាមិ ដែលមានកម្ពស់ជាងមួយម៉ែត្រ ដែលបានបោកបក់ពាសពេញតំបន់ ចំណែករថយន្ត និងផ្ទះ ត្រូវបានរុញចូលទៅក្នុងសមុទ្រ និងបានបំផ្លាញទូកនេសាទជាច្រើន។
ការខូចខាតយ៉ាងធ្ងន់ធ្ងរនៅ Ishikawa បានកើតឡើងនៅក្នុងទីក្រុងកំពង់ផែ Wajima ដែលល្បីល្បាញសម្រាប់ទីផ្សារពេលព្រឹក ។ គ្រោះរញ្ជួយដីនេះ បានបង្កឲ្យមានភ្លើងឆេះយ៉ាងសន្ធោសន្ធៅ ដែលបានបំផ្លាញអគារជាច្រើនខ្នងផងដែរ ៕
ប្រែសម្រួលៈ ណៃ តុលា
