យេរ៉ូសាឡឹម៖ តុលាការកំពូលរបស់អ៊ីស្រាអែល បានពន្យារពេលកាលពីថ្ងៃពុធ ចំពោះការធ្វើឱ្យសកម្មនៃច្បាប់ចម្រូងចម្រាស ដែលមានគោលបំណងរារាំងការប្រកាសថា នាយករដ្ឋមន្ត្រី លោក បេនចាមីន ណេតាន់យ៉ាហ៊ូ មិនស័ក្តិសម សម្រាប់តំណែងរបស់លោកបច្ចុប្បន្ននោះទេ។
នៅក្នុងការបោះឆ្នោត ៦-៥ ចៅក្រមតុលាការកំពូលបានសម្រេចថា ការធ្វើឱ្យសកម្មនៃអ្វីដែលគេហៅថា “ច្បាប់អសមត្ថភាព” នឹងត្រូវពន្យារពេលរហូតដល់ក្រោយការបោះឆ្នោតបន្ទាប់ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
សេចក្តីសម្រេចនេះរារាំងលោក ណេតាន់យ៉ាហ៊ុឲូ ដែលជាមេដឹកនាំកាន់អំណាចយូរជាងគេរបស់អ៊ីស្រាអែល ពីការទទួលបានអត្ថប្រយោជន៍ពីច្បាប់។ ការបោះឆ្នោតលើកក្រោយត្រូវបានគេរំពឹងទុកក្នុងរយៈពេលប្រហែល ២ឆ្នាំទៀត ប៉ុន្តែអាចនឹងត្រូវធ្វើឡើងមុននេះ។
សភាអ៊ីស្រាអែល ឬ Knesset ដែលគ្រប់គ្រងដោយក្រុមចម្រុះស្តាំនិយមរបស់លោក ណេតាន់យ៉ាហ៊ូ បានអនុម័តច្បាប់នេះនៅក្នុងខែមីនា ឆ្នាំ២០២៣ ដែលជាផ្នែកមួយនៃផែនការដ៏ចម្រូងចម្រាសរបស់រដ្ឋាភិបាលក្នុងការកែទម្រង់ប្រព័ន្ធយុត្តិធម៌របស់អ៊ីស្រាអែលឡើងវិញ។ ច្បាប់នេះការពារលោក ណេតាន់យ៉ាហ៊ូ ពីការត្រូវបានប្រកាសដោយអគ្គមេធាវីថា មិនស័ក្តិសមសម្រាប់តំណែងជុំវិញករណីទំនាស់ផលប្រយោជន៍។
លោក ណេតាន់យ៉ាហ៊ូ បាននិងកំពុងធ្វើការ ដើម្បីជួសជុលប្រព័ន្ធច្បាប់ ខណៈដែលកំពុងប្រឈមមុខនឹងការកាត់ក្តីព្រហ្មទណ្ឌលើករណីពុករលួយចំនួនបីដាច់ដោយឡែកពីគ្នា។ លោក ណេតាន់យ៉ាហ៊ូ មិនបានធ្វើអត្ថាធិប្បាយភ្លាមៗលើសេចក្តីសម្រេចនេះទេ៕ ប្រែសម្រួល ឈូក បូរ៉ា
