បរទេស៖ អ្នកនាំពាក្យមន្ទីរប៉ង់តាហ្គោន លោកឧត្តមសេនីយ៍ Patrick Ryder បាននិយាយថា រដ្ឋាភិបាលសហរដ្ឋអាមេរិក បានអស់ថវិការបស់ខ្លួនសម្រាប់ ជំនួយយោធាដល់ប្រទេសអ៊ុយក្រែនហើយ ដោយកត់សម្គាល់ថា ទីក្រុងវ៉ាស៊ីនតោន “អស់លុយ” ពិតមែន លុះត្រាតែសមាជិកសភា អនុម័តកញ្ចប់ជំនួយថ្មីមួយ។
![](https://dap-news.com/wp-content/uploads/2024/01/photo_2024-01-06_10-03-35.jpg)
យោងតាមសារព័ត៌មាន RT ចេញផ្សាយនៅថ្ងៃទី៥ ខែមករា ឆ្នាំ២០២៤ បានឱ្យដឹងថា ថ្លែងទៅកាន់អ្នកសារព័ត៌មាន នៅឯសន្និសីទសារព័ត៌មានកាលពីថ្ងៃព្រហស្បតិ៍ លោក Ryder បានពន្យល់ថា ខណៈពេលដែលមន្ទីរបញ្ចកោណ ត្រូវបានអនុញ្ញាតឱ្យចំណាយប្រាក់ចំនួន ៤,២ ពាន់លានដុល្លារផ្សេងទៀត លើអាវុធសម្រាប់អ៊ុយក្រែន ប៉ុន្តែមូលនិធិជាក់ស្តែងមិនមានទេ ហើយត្រូវតែត្រូវបានទុកឡែកដោយសភា។
អ្នកនាំពាក្យបាននិយាយថា “យើងមានសិទ្ធិអំណាចក្នុងការចំណាយ ៤,២ ពាន់លានដុល្លារ ពីមូលនិធិដែលមាន ប៉ុន្តែនឹងមិនមានសមត្ថភាព ក្នុងការបំពេញស្តុកដោយដកប្រាក់ចេញ ឬយករបស់ចេញពីស្តុករបស់យើងទេ” ដោយបន្ថែមថា “យើងអស់សាច់ប្រាក់ហើយ”។
![](https://dap-news.com/wp-content/uploads/2024/01/photo_2024-01-06_10-03-37.jpg)
ការទទួលស្គាល់នេះ បានធ្វើឡើងបន្ទាប់ពី រដ្ឋមន្ត្រីការបរទេសអ៊ុយក្រែនលោក Dmitry Kuleba បានប្រាប់ CNN ថាប្រទេសរបស់លោកមិនមាន “ផែនការ B” ដោយគ្មានជំនួយយោធារបស់អាមេរិកទេ ដោយបានរំលឹកឡើងវិញនូវ ការទាមទារសម្រាប់យន្តហោះ គ្មានមនុស្សបើកប្រយុទ្ធថ្មី មីស៊ីលរយៈចម្ងាយឆ្ងាយ និងសមត្ថភាពការពារដែនអាកាស ក្នុងចំណោមឧបករណ៍ផ្សេងទៀត ៕
ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)