តូក្យូ៖ សមាជិកសភាម្នាក់ មកពីបក្សពួកដ៏ធំបំផុត នៅក្នុងគណបក្សប្រជាធិបតេយ្យសេរី ដែលកំពុងកាន់អំណាច របស់ប្រទេសជប៉ុន ត្រូវបានចាប់ខ្លួនកាលពីថ្ងៃអាទិត្យ ជុំវិញការចោទប្រកាន់ពាក់ព័ន្ធនឹង រឿងអាស្រូវនៃការរៃអង្គាស ប្រាក់ផ្នែកនយោបាយ ដែលបានលុកលុយគណបក្ស មកដល់បច្ចុប្បន្ននេះ។
ព្រះរាជអាជ្ញាសង្ស័យ Yoshitaka Ikeda សមាជិកសភាតំណាង បានទទួលប្រាក់សរុបចំនួន ៤៨,២៦ លានយ៉េន (៣៣៣,០០០ដុល្លារ) ក្នុងរយៈពេល ៥ ឆ្នាំរហូតដល់ឆ្នាំ២០២២ ពីមូលនិធិដែលបង្កើតឡើង ដោយបក្សពួកដែលធ្លាប់ដឹកនាំ ដោយអតីតនាយករដ្ឋមន្ត្រីលោក ស៊ីនហ្ស៊ូ អាបេ។
លេខាធិការគោលនយោបាយរបស់លោក គឺលោក Kazuhiro Kakinuma អាយុ ៤៥ ឆ្នាំក៏ត្រូវបានចាប់ខ្លួនផងដែរ។ អ្នកទាំងពីរត្រូវបានគេចោទប្រកាន់ថា មិនបានប្រកាសប្រាក់ដែលលោក Ikeda ទទួលបានក្នុងរបាយការណ៍រៃអង្គាសប្រាក់នយោបាយ។
ក្នុងការឆ្លើយតបទៅ នឹងការចាប់ខ្លួនលោក Ikeda នាយករដ្ឋមន្ត្រីជប៉ុនលោក ហ្វូមីអូ គីស៊ីដា បានសម្តែងការព្រួយបារម្ភយ៉ាងខ្លាំង ដោយថាលោកបានយកចិត្ដទុកដាក់ លើហេតុការណ៍នេះយ៉ាងធ្ងន់ធ្ងរ។
លោក គីស៊ីដា បានប្រាប់អ្នកយកព័ត៌មានថា “យើងជាគណបក្សមួយគួរតែមានអារម្មណ៍ខ្លាំងនៃវិបត្តិ និងស្ដារការជឿទុកចិត្ត របស់សាធារណៈជនក្នុងនយោបាយ” នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
អគ្គលេខាធិការ LDP លោក Toshimitsu Motegi បានឲ្យដឹងផងដែរថា គណបក្សបានសម្រេចចិត្តបណ្តេញលោក Ikeda ចេញពីសមាជិកភាពរបស់ខ្លួន ៕
ប្រែសម្រួល ឈូក បូរ៉ា
