បរទេស៖ យោងតាមការចេញផ្សាយរបស់ RT ឯកអគ្គរដ្ឋទូតអ៊ីស្រាអែលប្រចាំអង្គការសហប្រជាជាតិ លោក Gilad Erdan បាននិយាយថា អង្គការសហប្រជាជាតិខ្លួនឯងគួរតែទទួលការកាត់ទោសនៅទីក្រុងឡាអេ ពីបទធ្វើសកម្មភាពបម្រើឲ្យអង្គការភេរវករ។
ការថ្លែងរបស់លោកគឺជាការឆ្លើយតបទៅនឹងករណីប្រល័យពូជសាសន៍ដែលត្រូវបានដាក់ពាក្យបន្តឹងមុននេះទៅតុលាការយុត្តិធម៌អន្តរជាតិ ICJជុំវិញសង្គ្រាមរបស់ខ្លួនជាមួយក្រុមហាម៉ាស។
កាលពីថ្ងៃសុក្រ អ៊ីស្រាអែលបានស្នើឱ្យ ICJ របស់អង្គការសហប្រជាជាតិ ដកសំណុំរឿងដែលនាំមកដោយអាហ្វ្រិកខាងត្បូងកាលពីចុងខែធ្នូ ដែលបានចោទប្រកាន់រដ្ឋថាបានប្រព្រឹត្តអំពើប្រល័យពូជសាសន៍នៅក្នុងការទម្លាក់គ្រាប់បែកដែលកំពុងបន្តនៅតំបន់ហ្គាហ្សា។
អ៊ីស្រាអែលបានបដិសេធយ៉ាងម៉ឺងម៉ាត់ចំពោះការចោទប្រកាន់ពីបទប្រល័យពូជសាសន៍ ដោយទទូចថា ការវាយលុកលើដី និងការវាយលុកតាមអាកាសនៃតំបន់ប៉ាឡេស្ទីនដែលឡោមព័ទ្ធគឺស្ថិតនៅក្នុងព្រំដែននៃច្បាប់អន្តរជាតិ ហើយថាវាមានសិទ្ធិជាមូលដ្ឋានក្នុងការការពារខ្លួន៕ ប្រែសម្រួល៖ស៊ុនលី
