បរទេស៖ លោក Lai Ching-te មកពីគណបក្សវឌ្ឍនភាពប្រជាធិបតេយ្យ (DPP) ដែលកំពុងកាន់អំណាចរបស់កោះតៃវ៉ាន់ ត្រូវបានបោះឆ្នោតជ្រើសរើសជាមេដឹកនាំថ្មីរបស់កោះគ្រប់គ្រងដោយខ្លួនឯងមួយនេះ បន្ទាប់ពីការបោះឆ្នោតប្រធានាធិបតីកាលពីថ្ងៃសៅរ៍។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែមករា ឆ្នាំ២០២៤ បានឱ្យដឹងថា លោក Lai ដែលបានចូលរួមការបោះឆ្នោតជាអនុប្រធានាធិបតីតៃវ៉ាន់បានអះអាងពីការទទួលបានជ័យជំនះបន្ទាប់ពីបេក្ខភាពតំណាងឱ្យគណបក្សប្រឆាំងដ៏សំខាន់របស់កោះនេះ លោក Hou Yu-ih បានទទួលស្គាល់ការបរាជ័យ។
គណបក្សវឌ្ឍនភាពប្រជាធិបតេយ្យ (DPP) ដែលកំពុងស្វែងរកអំណាចអាណត្តិទី៣ បដិសេធអធិបតេយ្យភាពរបស់ចិនលើកោះតៃវ៉ាន់ និងនៅតែអះអាងថា កោះនេះមានសិទ្ធិទទួលបានអត្តសញ្ញាណដាច់ដោយឡែកពីចិនដីគោក។ លោក Lai បាននិយាយថា លោកប្តេជ្ញារក្សាសន្តិភាពនៅទូទាំងច្រកសមុទ្រតៃវ៉ាន់ ប៉ុន្តែបានអំពាវនាវឱ្យបង្កើនការការពារទឹកដីដែលគ្រប់គ្រងដោយខ្លួនឯង ដើម្បីទប់ស្កាត់ការគំរាមកំហែងដែលអាចកើតមានពីទីក្រុងប៉េកាំង។
លោក Lai ត្រូវបានប្រកាសថាជាអ្នកឈ្នះ បន្ទាប់ពីលទ្ធផលមួយផ្នែកបង្ហាញថា លោកទទួលបានសំឡេងគាំទ្រ 40.2% ដែលជំរុញឱ្យលោក Hou ក៏ដូចជាអតីតអភិបាលក្រុងតៃប៉ិ លោក Ko Wen-je នៃគណបក្សប្រជាជនតៃវ៉ាន់ ដកខ្លួនចេញពីការប្រកួត។ ប្រធានាធិបតីកោះតៃវ៉ាន់ដែលកាន់អំណាចគឺលោកស្រី Tsai Ing-wen ត្រូវបានហាមឃាត់ដោយរដ្ឋធម្មនុញ្ញពីការស្វែងរកការកាន់អំណាចនៅអាណត្តិទី៣បន្តទៀត។
យោងតាមសារព័ត៌មាន រ៉យទ័រ , លោក Lai បាននិយាយនៅទីក្រុង Tainan ភាគខាងត្បូងកោះកាលពីថ្ងៃសៅរ៍ មុនពេលបោះឆ្នោតរបស់លោកថា៖ «រាល់ការបោះឆ្នោតត្រូវបានវាយតម្លៃ ព្រោះនេះជាលទ្ធិប្រជាធិបតេយ្យដែលរកបានដោយពិបាករបស់កោះតៃវ៉ាន់»៕ ប្រែសម្រួលៈ ណៃ តុលា
