បរទេស៖ មេបញ្ជាការក្រុមសកម្មប្រយុទ្ធប៉ាឡេស្ទីន Jenin Brigades លោក Yasser Hanoun ត្រូវបានសម្លាប់បន្ទាប់ពីការ វាយប្រហារតាមអាកាសរបស់អ៊ីស្រាអែល ត្រូវចំរថយន្តរបស់លោក នៅក្នុងជំរុំជនភៀសខ្លួន Jenin ក្នុងតំបន់ West Bank។
សាក្សីដែលបានឃើញផ្ទាល់ភ្នែកបានប្រាប់កាសែត ថាយន្តហោះឈ្លបយកការណ៍របស់អ៊ីស្រាអែល បានទម្លាក់គ្រាប់បែកលើរថយន្ត ដែលដឹកលោក Hanoun នៅតាមដងផ្លូវក្នុងជំរុំ Jenin ដោយបំផ្លាញរថយន្តទាំងស្រុង។ ការវាយប្រហារនេះក៏បានធ្វើឲ្យមនុស្ស ១៥ នាក់ផ្សេងទៀតរងរបួសផងដែរ។
ប្រភពវេជ្ជសាស្ត្របានឲ្យដឹងថា សាកសពរបស់លោក Hanoun ត្រូវបានបញ្ជូនទៅមន្ទីរពេទ្យរដ្ឋាភិបាល Jenin ចំណែកអ្នករបួសបួននាក់ផ្សេងទៀត ក្នុងនោះមានម្នាក់ស្ថិតក្នុង ស្ថានភាពធ្ងន់ធ្ងរត្រូវបានបញ្ជូនទៅបន្ទប់វះកាត់។
ប្រភពវេជ្ជសាស្ត្របានឲ្យដឹងទៀតថា ជនជាតិប៉ាឡេស្ទីន ដែលរងរបួសមួយចំនួនផ្សេងទៀត ត្រូវបានបញ្ជូនទៅមន្ទីរពេទ្យ Ibn Sina ក្នុងទីក្រុង។ ទីក្រុងក្នុងនោះមានមនុស្ស៤នាក់ស្ថិតក្នុងស្ថានភាពធម្មតា ២នាក់របួសមធ្យម និងម្នាក់ទៀតរបួសធ្ងន់ ។
ជម្លោះរវាងប៉ាឡេស្ទីន និងអ៊ីស្រាអែលនៅតំបន់ West Bank កាន់តែតានតឹងឡើង បន្ទាប់ពីអ៊ីស្រាអែល បើកការវាយលុកយោធារបស់ខ្លួន នៅតំបន់ហ្គាហ្សាស្ទ្រីប ដើម្បីសងសឹកការវាយប្រហារ របស់ក្រុមហាម៉ាស កាលពីខែតុលា ឆ្នាំមុន៕
ប្រែសម្រួល ឈូក បូរ៉ា
