បរទេស៖ អគ្គស្នងការរងនគរបាលជាតិ របស់ប្រទេសថៃ លោក Surachate Hakparn ជឿជាក់ថា បណ្តឹងចំនួនពីរដែលលោកកំពុង ប្រឈមមុខលើករណីល្បែងស៊ីសង គឺជាផ្នែកមួយនៃការឃុបឃិតគ្នា ដោយប៉ូលិសផ្សេងទៀត ដើម្បីបង្ខូចកេរ្តិ៍ឈ្មោះលោក។
យោងតាមសារព័ត៌មាន The Nation របស់ថៃ ចេញផ្សាយកាលពីថ្ងៃទី២២ ខែកុម្ភៈ ឆ្នាំ២០២៤ បានឱ្យដឹងថា ជាការឆ្លើយតបទៅនឹងរបាយការណ៍លេចធ្លាយ ដែលមិនបានបញ្ជាក់ដែលថា ការិយាល័យស៊ើបអង្កេតឧក្រិដ្ឋកម្ម តាមអ៊ីនធឺណិតបានកោះហៅលោក ជុំវិញទំនាក់ទំនងហិរញ្ញវត្ថុរបស់លោក ទៅនឹងករណីល្បែងស៊ីសងនោះ លោក Surachat បាននិយាយថា សកម្មភាពនេះគឺ “មានបំណងបង្ខូចកេរ្តិ៍ឈ្មោះ លោកសម្រាប់រយៈពេលវែង”។
កាលពីថ្ងៃព្រហស្បតិ៍ ឧត្តមសេនីយ៍ឯក ចារ៉ុនគៀត ប៉ាន់កែវ បានដាក់ពាក្យបណ្តឹងទៅការិយាល័យ នៃគណៈកម្មាធិការជាតិប្រឆាំងអំពើពុករលួយ (NACC) ដោយចោទប្រកាន់មន្ត្រីនគរបាលជាន់ខ្ពស់ និងមន្ត្រីក្រោមឱវាទទាំង៧ ពីបទប្រព្រឹត្តល្មើសនឹងមាត្រា ១៥៧ និងមាត្រា ១៤៩ នៃក្រមព្រហ្មទណ្ឌ។ មាត្រា ១៥៧ គឺហាមមន្ត្រីមិនឲ្យប្រើប្រាស់ដោយមិនទៀងត្រង់ ឬមិនប្រើសិទ្ធិអំណាចរបស់ខ្លួន ខណៈពេលក្រោយពាក់ព័ន្ធនឹងបញ្ហាសូកប៉ាន់។
លោក ចារ៉ុនគៀត ដែលជាស្នងការរង នៃការិយាល័យស៊ើបអង្កេតមជ្ឈិម បាននិយាយថា លោក ស៊ូរ៉ាឆាត មានទំនាក់ទំនងផ្នែកហិរញ្ញវត្ថុទៅនឹង គេហទំព័រលេងល្បែងអនឡាញ ដែលដំណើរការដោយ ស៊ូឆានុន ស៊ូជីនីនស្រី ដែលត្រូវបានគេស្គាល់ថា ជា “Minnie” ។
លោក ស៊ូរ៉ាឆាត បានបដិសេធយ៉ាងដាច់អហង្ការ ចំពោះការចោទប្រកាន់ទាំងអស់ ប៉ុន្តែលោកបាននិយាយថា លោកមិនដឹងថាមន្ត្រីក្រោមឱវាទរបស់ លោកមានជាប់ពាក់ព័ន្ធនឹងករណីនេះ ឬយ៉ាងណា នោះទេ។
លោកក៏បានចោទជាសំណួរថា “មានមន្ត្រីប៉ូលីសជាន់ខ្ពស់ជាច្រើននាក់ នៅក្នុងជួរប៉ូលីសថៃ ដែលរកបានរហូតដល់ ១០០ លានបាតពីគេហទំព័រលេងល្បែងអនឡាញ តាមរយៈគណនីបោកប្រាស់របស់ពួកគេ។ ហេតុអ្វីមិនចាត់វិធានការ? ហេតុអ្វីបានជាមកតម្រង់មកខ្ញុំយ៉ាងពិសេស?”
លោកបានដាស់តឿនប៉ូលិសផ្សេងទៀត “កុំឲ្យមានការច្រណែន” ដោយនិយាយថា ប៉ូលិសគួរតែប្រកួតប្រជែងគ្នាលើការងារវិញ។
លោកក៏បានបង្ហើបដែរថា លោកបានចាត់វិធានការផ្លូវច្បាប់លើមន្ត្រីជាង ២០០នាក់ ក្នុងនោះមានពីរនាក់កំពុងកាន់តំណែងជា ឧត្តមសេនីយ៍ប៉ូលិសជុំវិញបញ្ហានេះ៕
ប្រែសម្រួលៈ ណៃ តុលា
