តូក្យូ៖ មេដឹកនាំនៃក្រុមប្រទេសឧស្សាហកម្មទាំង៧ បានសន្យាបន្តការគាំទ្រ “មិនរាថយ” សម្រាប់អ៊ុយក្រែន ខណៈដែលប្រទេសនេះបានប្រារព្ធខួបលើកទី២ នៃការឈ្លានពានរបស់រុស្ស៊ី ដោយប្តេជ្ញាបន្តដាក់សម្ពាធលើទីក្រុងម៉ូស្គូ និងស្តីបន្ទោសប្រតិបត្តិការអាវុធ របស់ខ្លួនជាមួយកូរ៉េខាងជើង។
មេដឹកនាំបានឲ្យដឹង នៅក្នុងសេចក្តីថ្លែងការណ៍មួយ ដែលបានចេញបន្ទាប់ពីសន្និសីទ វីដេអូរបស់ពួកគេ ដែលរៀបចំដោយប្រធានប្ដូរវេនរបស់អ៊ីតាលីថា “នៅពេលដែលអ៊ុយក្រែន ចូលដល់ឆ្នាំទី ៣ នៃសង្រ្គាមឥតឈប់ឈរនេះ រដ្ឋាភិបាល និងប្រជាជនរបស់ខ្លួនអាច ពឹងផ្អែកលើការគាំទ្ររបស់ G7 ឱ្យបានយូរតាម ដែលខ្លួនត្រូវការ” ។
នាយករដ្ឋមន្ត្រីជប៉ុនលោក ហ្វូមីអូ គីស៊ីដា បានអំពាវនាវឱ្យមាន “ការរួបរួម” ក្នុងចំណោមសមាជិក G7 ក្នុងការបន្តដាក់ទណ្ឌកម្មលើប្រទេសរុស្ស៊ី និងស្វែងរកការនាំមកនូវសន្តិភាពយូរអង្វែង សម្រាប់អ៊ុយក្រែន ខណៈពេលដែលរិះគន់កូរ៉េខាងជើង ចំពោះការគាំទ្រផ្នែកយោធារបស់ខ្លួន សម្រាប់ទីក្រុងម៉ូស្គូ។
លោក គីស៊ីដា ត្រូវបានដកស្រង់សម្តីដោយបាននិយាយ នៅក្នុងសេចក្តីប្រកាសព័ត៌មានថា “ការប្រើប្រាស់របស់រុស្ស៊ី ចំពោះមីស៊ីលផ្លោងរបស់កូរ៉េខាងជើងនៅអ៊ុយក្រែន គឺមិនអាចទទួលយកបានទាំងស្រុង” លោក គីស៊ីដា ត្រូវបានដកស្រង់សម្តីដោយបានគូសបញ្ជាក់ថា ការផ្ទេរអាវុធកូរ៉េខាងជើង ទៅឱ្យរុស្ស៊ី គឺជាការរំលោភលើសេចក្តីសម្រេច របស់ក្រុមប្រឹក្សាសន្តិសុខអង្គការសហប្រជាជាតិ។
ការជួបជុំនេះជាលើកដំបូងក្នុងចំណោមមេដឹកនាំ G7 ចាប់តាំងពីប្រទេសអ៊ីតាលី ឡើងកាន់តំណែងជាប្រធានប្ដូរវេន G7 ឆ្នាំនេះ។ G7 រួមមាន អង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន សហរដ្ឋអាមេរិក និងសហភាពអឺរ៉ុប៕
ប្រែសម្រួល ឈូក បូរ៉ា
