បរទេស៖ យោងតាមការចេញផ្សាយរបស់ RT ប្រធានាធិបតីបារាំង លោក Emmanuel Macron បានប្រកាសថា ប្រទេសបារាំងកំពុងដឹកនាំក្រុមចម្រុះថ្មីមួយ ដែលមានបំណងផ្តល់ឱ្យអ៊ុយក្រែននូវ មីស៊ីល និងគ្រាប់បែករយៈចម្ងាយមធ្យម និងរយៈចម្ងាយឆ្ងាយផងដែរ។
ទោះបីជាយ៉ាងណាក្តី នៅក្នុងសេចក្តីថ្លែងការណ៍មួយក្រោយ កិច្ចប្រជុំនៅក្នុងទីក្រុងប៉ារីសស្តីអំពីបញ្ហាអ៊ុយក្រែន លោកក៏មិនបានច្រានចោលការពង្រាយ កម្លាំងដីដើម្បីគាំទ្រក្រុងកៀវនាពេលអនាគតនោះទេ។
លោក Macron បានធ្វើការកត់សម្គាល់នេះ បន្ទាប់ពីកិច្ចប្រជុំកំពូលនៃ ក្រុមគាំទ្ររបស់អ៊ុយក្រែនកាលពីថ្ងៃចន្ទ ដែលមានបំណងបង្ហាញពី ការគាំទ្រឥតងាករេសម្រាប់គៀវចំពេល មានការផ្អាកជំនួយរបស់អាមេរិក។
យោងតាមមេដឹកនាំបារាំង ក្រុមចម្រុះដែលទើបបង្កើតថ្មីព្យាយាម ផ្តល់លទ្ធភាពឱ្យអ៊ុយក្រែន ធ្វើការវាយប្រហារយ៉ាងស៊ីជម្រៅ ចូលទៅក្នុងប្រទេសរុស្សីហើយ លោក Macron បានបន្ថែមថា មានការយល់ស្របយ៉ាងទូលំទូលាយ ដើម្បីធ្វើកាន់តែច្រើន និងលឿនជាមួយគ្នាដើម្បីគាំទ្រដល់ទីក្រុង គៀវ។
ចំណាត់ការនេះកើតឡើងខណៈការបន្តជំនួយរបស់សហរដ្ឋអាមេរិកដល់អ៊ុយក្រែននៅមានការសង្ស័យថានឹងមិនអាចទៅរួចហើយ កញ្ចប់ថវិកាចុងក្រោយបំផុតរបស់ប្រធានាធិបតី Joe Biden ដែលគិតជាទឹកប្រាក់បន្ថែមចំនួន ៦០ពាន់លានដុល្លារ សម្រាប់ទីក្រុងគៀវ បានស្ថិតក្នុងការរាំងស្ទះអស់ជាច្រើនខែ ដោយសារតែការប្រឆាំងពីគណបក្សសាធារណរដ្ឋ នៅក្នុងសភាតំណាងរាស្រ្ត ៕
ប្រែសម្រួល៖ ស៊ុន លី
