បរទេស៖ យោងតាមការចេញផ្សាយរបស់ RT រដ្ឋាភិបាលរបស់ប្រទេសហៃទី បានប្រកាសដាក់ប្រទេសក្នុងភាពអាសន្ន រយៈពេលបីថ្ងៃ និងបម្រាមគោចរពេលយប់ បន្ទាប់ពីក្រុមក្មេងទំនើងប្រដាប់អាវុធ បានវាយលុកពន្ធនាគារដ៏ធំបំផុតចំនួនពីរ របស់ប្រទេសការាបៀនកាលពីចុងសប្តាហ៍ ដែលអនុញ្ញាតឱ្យអ្នកទោស រាប់ពាន់នាក់រត់គេចខ្លួន។
ប្រភពដដែលបានឲ្យដឹងដែរថា មេដឹកនាំក្រុមទំនើងកំពុងទាមទារ ឲ្យលោកនាយករដ្ឋមន្ត្រី Ariel Henry លាលែងពីតំណែងខណៈដែលបច្ចុប្បន្ន លោកកំពុងធ្វើដំណើរទៅក្រៅប្រទេសនៅប្រទេសកេនយ៉ា។
យោងតាមរបាយការណ៍ប្រព័ន្ធផ្សព្វផ្សាយ ក្នុងស្រុកពន្ធនាគារដែលត្រូវបានវាយលុក គឺជាពន្ធនាគារជាតិរបស់ប្រទេសហៃទី នៅក្នុងរដ្ឋធានី Port-au-Prince និងមួយទៀតនៅ Croix-des-Bouquets ដែលស្ថិតក្បែរនោះផងដែរ។
គួរឲ្យដឹងដែរថា ស្ទើរតែទាំងអស់នៃ អ្នកទោសប្រមាណ ៤០០០នាក់ នៅឯកន្លែងស្នាក់នៅក្នុងទីក្រុង Port-au-Prince ត្រូវបានគេរាយការណ៍ថា បានរត់គេចខ្លួនហើយយ៉ាងហោចណាស់មនុស្ស ១២នាក់ ត្រូវបានគេរាយការណ៍ថាបានស្លាប់ រួមទាំងមន្រ្តីប៉ូលីសផងដែរ ក្នុងអំឡុងពេលនៃការវាយប្រហារនេះ៕
ប្រែសម្រួល៖ ស៊ុន លី
