បរទេស៖ ទីក្រុងមូស្គូបាន និយាយថា សំណើទាក់ទងនឹងសន្តិសុខអន្តរជាតិ គួរតែត្រូវបានពិចារណា ក្នុងបរិបទនៃការពិតពិភពលោក បន្ទាប់ពីប្រទេសចិនបានអំពាវនាវ ឱ្យប្រទេសមហាអំណាច នុយក្លេអ៊ែរធំជាងគេលើពិភពលោក ចរចាលើសន្ធិសញ្ញាថ្មីមួយ។
យោងតាមសារព័ត៌មាន RT ចេញផ្សាយ នៅថ្ងៃទី១១ ខែមីនា ឆ្នាំ២០២៤ បានឱ្យដឹងថា ក្រសួងការបរទេសរុស្ស៊ី បានប្រាប់អាជីវកម្ម ប្រចាំថ្ងៃ RBK ថាទីក្រុងមូស្គូ និងទីក្រុងប៉េកាំងចាត់ ទុកគំនិតផ្តួចផ្តើម របស់គ្នាទៅវិញទៅមក ដោយការយកចិត្តទុកដាក់ជាពិសេស និងការគោរព យ៉ាងជ្រាលជ្រៅ ដោយបន្ថែមថា ប្រទេសទាំងពីរបានប្តេជ្ញាចិត្ត ក្នុងការធ្វើឱ្យទំនាក់ទំនងទ្វេភាគីរីកចម្រើនបន្ថែមទៀត។
ក្រសួងការបរទេសរុស្ស៊ីបានបន្តថា សំណើរបស់ចិន ចាំបាច់ត្រូវពិចារណាលើភាព ជាក់ស្តែងខាងយោធា និងនយោបាយ រួមជាមួយនឹងកត្តាផ្សេងទៀត ទាក់ទងនឹងសន្តិសុខអន្តរជាតិ និងស្ថិរភាពយុទ្ធសាស្ត្រ។ ក្រសួងបានសំដៅជាពិសេស ទៅលើការចុះខ្សោយនៃទំនាក់ទំនងរវាងមហាអំណាច ‘នុយក្លេអ៊ែរទាំងប្រាំ រួមមាន អង់គ្លេស បារាំង អាមេរិក ចិន និងរុស្ស៊ី។
ទីក្រុងមូស្គូបាននិយាយថា ការកាត់បន្ថយការប្រឈមមុខ ដាក់គ្នារវាងរដ្ឋប្រដាប់អាវុធ នុយក្លេអ៊ែរដោយការលុបបំបាត់ “ភាពផ្ទុយគ្នាជាមូលដ្ឋាន ក្នុងវិស័យសន្តិសុខ” គឺជាបញ្ហានៃ “អាទិភាពដាច់ខាត” ។
ប្រែសម្រួលៈ ណៃ តុលា
