យេរ៉ូសាឡឹម ៖ សភាអ៊ីស្រាអែល នៅថ្ងៃពុធម្សិលមិញនេះ បានអនុម័តថវិការដ្ឋ ដែលបានកែសម្រួល សម្រាប់ឆ្នាំ២០២៤ ដើម្បីផ្តល់មូលនិធិ ដល់សង្រ្គាមរបស់ប្រទេសប្រឆាំង នឹងក្រុមហាម៉ាស នៅតំបន់ហ្គាហ្សា។
យោងតាមក្រសួងហិរញ្ញវត្ថុ ថវិកាដែលបានធ្វើបច្ចុប្បន្នភាព មានចំនួនប្រហែល ៥៨៤ ពាន់លាន shekels (ប្រហែល ១៦១ពាន់លានដុល្លារអាមេរិក) ការកើនឡើងចំនួន ៧០ពាន់លាន shekels បើប្រៀបធៀប ទៅនឹងថវិកាដើម ដែលបានអនុម័តកាលពីខែឧសភា ឆ្នាំមុន។
ការចំណាយលើវិស័យការពារជាតិ តែម្នាក់ឯងនឹងកើនឡើង ៥៥ពាន់លានដុល្លា។ ផែនការសារពើពន្ធប៉ាន់ស្មានឱនភាព ៦,៦ភាគរយ នៃផលិតផលក្នុងស្រុកសរុប ។
សេចក្តីថ្លែងការណ៍បានកត់សម្គាល់ថា ថវិការបស់ក្រសួងរដ្ឋាភិបាល ទាំងអស់ត្រូវបានកាត់ ដើម្បីគាំទ្រវិធានការតុល្យភាព នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ថវិកាថ្មីនេះក៏រួមបញ្ចូលនូវវិធានការមួយចំនួនដើម្បីបង្កើនប្រាក់ចំណូល របស់រដ្ឋផងដែរ ដូចជាការយកពន្ធលើប្រាក់ចំណេញពីធនាគារ និងកាត់បន្ថយការបង់រំលោះ សម្រាប់និយោជិត ដូចដែលបានព្រមព្រៀង ជាមួយសហជីពកម្មករអ៊ីស្រាអែលដ៏ធំបំផុត Histadrut៕
ប្រែសម្រួល ឈូក បូរ៉ា
