បរទេស៖ យោងតាមសារព័ត៌មាន BBC ជាភាសាវៀតណាម ចេញផ្សាយកាលពីថ្ងៃទី១៥ ខែមីនា ឆ្នាំ២០២៤ បានឱ្យដឹងថា ព្រះមហាក្សត្រ និងព្រះមហាក្សត្រិយានីនៃប្រទេសហូឡង់ នឹងពន្យារពេលដំណើរទស្សនកិច្ចទៅកាន់ប្រទេសវៀតណាម ដែលគ្រោងនឹងធ្វើឡើងចាប់ពីថ្ងៃទី ១៩ ដល់ថ្ងៃទី ២២ ខែមីនា តាមសំណើរបស់រដ្ឋាភិបាលវៀតណាម នេះបើយោងតាមគ្រួសាររាជវង្សហូឡង់។
គេហទំព័រ Dutch Royal កាលពីថ្ងៃព្រហស្បតិ៍ ទី១៤ ខែមីនា បានប្រកាសថា “អាជ្ញាធរវៀតណាមបានស្នើសុំពន្យារពេលដំណើរទស្សនកិច្ចផ្លូវរដ្ឋរបស់ព្រះមហាក្សត្រ និងម្ចាស់ក្សត្រី Maxima ទៅកាន់សាធារណៈរដ្ឋសង្គមនិយមវៀតណាមដោយហេតុផលផ្ទៃក្នុង។ ដំណើរទស្សនកិច្ចផ្លូវរដ្ឋគ្រោងនឹងធ្វើឡើងចាប់ពីថ្ងៃទី ១៩ ដល់ថ្ងៃទី ២២ ខែមីនា នឹងមិនដំណើរការទេ”។
កន្លងមក យោងតាមផែនការដែលបានប្រកាសដោយរាជវង្សហូឡង់នៅដើមខែធ្នូ ឆ្នាំ ២០២៣ ព្រះមហាក្សត្រ Willem-Alexander និងម្ចាស់ក្សត្រី Máxima គ្រោងនឹងធ្វើទស្សនកិច្ចនៅវៀតណាមចាប់ពីថ្ងៃទី ១៩ ដល់ថ្ងៃទី ២២ ខែមីនា ហើយនៅថ្ងៃទី ១៩ ខែមីនា ដោយនឹងមានជំនួបជាមួយប្រធានាធិបតីវៀតណាម លោក Vo Van Thuong ដែលបានចេញលិខិតអញ្ជើញ។
សារព័ត៌មានហូឡង់មួយចំនួនបានរាយការណ៍ព័ត៌មានខាងលើ រួមជាមួយនឹងមតិយោបល់ថា មិនមាន “ការរំខាន” នាពេលថ្មីៗនេះនៅក្នុងប្រទេសកុម្មុយនិស្តមួយនេះទេ។
ព្រះមហាក្សត្រនិងព្រះមហាក្សត្រិយានី បានពន្យារពេល ប៉ុន្តែក្រុមដែលអមដំណើរនៅតែទៅដដែល។
នៅថ្ងៃទី ២០ ខែកុម្ភៈ គ្រួសាររាជវង្សហូឡង់បានប្រកាសអំពីកាលវិភាគលម្អិតនៃដំណើរទស្សនកិច្ចផ្លូវរដ្ឋរបស់ព្រះមហាក្សត្រ និងព្រះមហាក្សត្រី នៅលើទំព័រព័ត៌មានផ្លូវការ។
សូមជម្រាបថា តាមកម្មវិធីនាថ្ងៃទី ១៩ ខែមីនា ព្រះមហាក្សត្រ និងម្ចាស់ក្សត្រីនៃប្រទេសហូឡង់ត្រូវបានរំពឹងថានឹងទទួលបដិសណ្ឋារកិច្ចដោយប្រធានរដ្ឋ Vo Van Thuong និងភរិយា Phan Thi Thanh Tam ដោយទទួលបដិសណ្ឋារកិច្ចនៅវិមានប្រធានាធិបតី។
ព្រះមហាក្សត្រ Willem-Alexander និងប្រធានរដ្ឋវៀតណាម លោក Vo Van Thuong នឹងពិនិត្យមើលឆ្មាំកិត្តិយសនៃកងទ័ពប្រជាជនវៀតណាម។
បន្ទាប់គឺជាជំនួបរវាងគណៈប្រតិភូដើម្បីពិភាក្សាលើឯកសារដែលត្រូវចុះហត្ថលេខារវាងហូឡង់ និងវៀតណាម។ កិច្ចព្រមព្រៀងមួយចំនួនដែលបានលើកឡើងរួមមានៈ កិច្ចសហប្រតិបត្តិការលើវិស័យកសិកម្មរវាងតំបន់ទីក្រុង Westland និងខេត្ត Lam Dong; វិញ្ញាបនប័ត្រអេឡិចត្រូនិចនៃផលិតផលរុក្ខជាតិរវាងក្រសួងកសិកម្ម ធម្មជាតិ និងគុណភាពអាហារហូឡង់ និងក្រសួងកសិកម្ម និងអភិវឌ្ឍន៍ជនបទវៀតណាម៕
ប្រែសម្រួលៈ ណៃ តុលា
