តូក្យូ៖ រដ្ឋាភិបាលជប៉ុនបានឲ្យដឹងថា ប្រទេសកូរ៉េខាងជើង បានបាញ់មីស៊ីលផ្លោងចំនួនបីគ្រាប់ឆ្ពោះ ទៅកាន់សមុទ្រជប៉ុននៅថ្ងៃចន្ទនេះ ដែលទំនងជាធ្លាក់នៅខាងក្រៅ តំបន់សេដ្ឋកិច្ចផ្តាច់មុខរបស់ប្រទេសជប៉ុន ដែលជំរុញឱ្យទីក្រុងតូក្យូ ធ្វើការតវ៉ាយ៉ាងម៉ឺងម៉ាត់។
ក្រសួងការពារជាតិបានឲ្យដឹងថា ទីក្រុងព្យុងយ៉ាងបានបាញ់កាំជ្រួចពីរ គ្រាប់នៅម៉ោងប្រហែល ៧ និង ៤៤នាទី ព្រឹក និងមួយគ្រាប់នៅម៉ោង ៨ និង ២១ នាទីព្រឹក ដោយមួយគ្រាប់ហោះបានចម្ងាយប្រហែល ៣៥០គីឡូម៉ែត្រ ក្នុងរយៈកម្ពស់អតិបរមាប្រហែល ៥០គីឡូម៉ែត្រ។ ការបាញ់មីស៊ីលផ្លោងចុងក្រោយដោយកូរ៉េខាងជើងកាលពីថ្ងៃទី១៤ មករា ពាក់ព័ន្ធនឹងមីស៊ីលរយៈចម្ងាយមធ្យម ។
នាយករដ្ឋមន្ត្រីលោក ហ្វូមីអូ គីស៊ីដា បានឲ្យដឹងនៅក្នុងសម័យប្រជុំសភា នៅពេលក្រោយនៅថ្ងៃនោះថា “ប្រទេសជប៉ុន ថ្កោលទោសយ៉ាងខ្លាំង ចំពោះការបាញ់មីស៊ីលផ្លោង ចុងក្រោយបំផុត ដែលបំពានលើដំណោះស្រាយ របស់ក្រុមប្រឹក្សាសន្តិសុខអង្គការសហប្រជាជាតិ” ។
លោក គីស៊ីដា បានលើកឡើងថា “សកម្មភាពជាបន្តបន្ទាប់របស់កូរ៉េខាងជើង គំរាមកំហែងដល់សន្តិភាព និងសន្តិសុខនៃប្រទេសរបស់យើង តំបន់របស់យើង និងសហគមន៍អន្តរជាតិ ហើយពួកគេមិនអាចទទួលយកបានទាំងស្រុង” ។
លោកបន្ដថា មិនមានរបាយការណ៍អំពីការខូចខាតដល់នាវា ឬយន្តហោះរបស់ជប៉ុន បន្ទាប់ពីការបាញ់បង្ហោះនោះទេ។ យោធាកូរ៉េខាងត្បូង បានឲ្យដឹងថា កាំជ្រួចពីរគ្រាប់ដំបូង ដែលបាញ់ចេញពីក្បែរទីក្រុងព្យុងយ៉ាង ហាក់ដូចជាមានរយៈចម្ងាយខ្លី៕
ប្រែសម្រួល ឈូក បូរ៉ា
