យូអិន ៖ អគ្គលេខាធិការអង្គការ សហប្រជាជាតិលោក Antonio Guterres អំពាវនាវឱ្យមានការស៊ើបអង្កេត លើរូបភាពយន្តហោះដ្រូន ដែលហាក់ដូចជាបង្ហាញ ពីការវាយប្រហាររបស់អ៊ីស្រាអែល លើជនស៊ីវិល ៤នាក់នៅតំបន់ហ្គាហ្សា ។
លោក Farhan Haq អ្នកនាំពាក្យរងរបស់ Guterres បានឲ្យដឹងថា “អគ្គលេខាធិការ មានការរំខានយ៉ាងខ្លាំង ចំពោះខ្សែវីដេអូដែលត្រូវ បានគេរាយការណ៍ថា បង្ហាញជនជាតិប៉ាឡេស្ទីន ៤នាក់ដែលកំពុងដើរ ដោយគ្មានអាវុធ ដែលត្រូវបានសម្លាប់ ដោយការវាយប្រហារ តាមអាកាសរបស់អ៊ីស្រាអែល នៅហ្គាហ្សា លោកអំពាវនាវឱ្យមានការស៊ើប អង្កេតហ្មត់ចត់ ឯករាជ្យ និងគួរឱ្យជឿជាក់លើព្រឹត្តិការណ៍ទាំងនេះ” ។
លោក Guterres គូសបញ្ជាក់ថា គ្រប់ភាគីនៃជម្លោះត្រូវតែគោរព តាមច្បាប់មនុស្សធម៌អន្តរជាតិ រួមទាំងគោលការណ៍នៃភាពខុសគ្នា សមាមាត្រ និងការប្រុងប្រយ័ត្ន ក្នុងការវាយប្រហារ ។
រូបភាពដែលទទួលបានដោយ Al Jazeera បង្ហាញថា បុរស ៤នាក់ដែលហាក់ដូចជាគ្មានអាវុធកំពុងដើរនៅលើផ្លូវមួយ ហើយយន្តហោះដ្រូនរបស់អ៊ីស្រាអែលបានបើកការវាយប្រហារលើពួកគេ។
បុរសពីរនាក់បានស្លាប់ភ្លាមៗ អ្នកនៅរស់ម្នាក់ត្រូវបានគេឃើញដើរទៅមុខ ជាក់ស្តែងក្នុងការព្យាយាមរត់គេចខ្លួន។ ពួកគេត្រូវបានវាយប្រហារក្នុងការវាយប្រហារលើកទីពីរ ។ បុរសម្នាក់ទៀតត្រូវបានគេមើលឃើញកំពុងដួលនៅលើផ្លូវ ហើយត្រូវបានបាញ់ដោយកាំជ្រួចមួយគ្រាប់ទៀត។
Al Jazeera បានឲ្យដឹងថា ការវាយប្រហារនេះត្រូវបានគេជឿថា បានកើតឡើងនៅដើមខែកុម្ភៈ ឆ្នាំ២០២៤ បន្ទាប់ពីអ៊ីស្រាអែល ត្រូវបានបញ្ជាដោយតុលាការ យុត្តិធម៌អន្តរជាតិឱ្យចាត់វិធានការទាំងអស់ ដើម្បីជៀសវាងអំពើប្រល័យ ពូជសាសន៍៕
ប្រែសម្រួល ឈូក បូរ៉ា
