ម៉ូស្គូ៖ លោក Alexander Bortnikov ប្រធានក្រុមសេវាសន្តិសុខសហព័ន្ធរុស្ស៊ី ហៅកាត់ថា (FSB) បានអះអាងថា ការវាយប្រហារភេរវករនៅសាលប្រគុំតន្ត្រី Crocus City Hall ត្រូវបានរៀបចំឡើង ដោយក្រុមឥស្លាមជ្រុលនិយម ហើយសេវាស៊ើបការណ៍សម្ងាត់របស់អ៊ុយក្រែន ត្រូវបានចូលរួមដោយផ្ទាល់ផងដែរ ។
លោក Bortnikov បានលើកឡើងដូច្នេះនៅក្នុងបទសម្ភាសន៍ជាមួយទូរទស្សន៍ Rossiya 1 ថា “យើងជឿជាក់ថា ការវាយប្រហារត្រូវបានរៀបចំឡើង ដោយក្រុមឥស្លាមជ្រុលនិយម ហើយតាមធម្មជាតិ សេវាចារកម្មលោកខាងលិច ក៏បានចូលរួមចំណែកក្នុងរឿងនេះដែរ” ។
លោកបានកត់សម្គាល់ទៀតថា ចារកម្មលោកខាងលិច និងអ៊ុយក្រែន ត្រូវការការវាយប្រហារ ពីភេរវករនៅសាលាក្រុង Crocus ដើម្បីបង្កើតការភ័យស្លន់ស្លោ នៅក្នុងសង្គមរុស្ស៊ី ។
គួរបញ្ជាក់ថា កន្លងមក អាជ្ញាធរអ៊ុយក្រែន បានបដិសេធម្តងហើយម្តងទៀតចំពោះការអះអាង ពីការជាប់ពាក់ព័ន្ធរបស់អ៊ុយក្រែន ក្នុងការវាយប្រហារនេះ ។
គេបានដឹងថា ការបាញ់ប្រហារមួយ បានកើតឡើងកាលពីថ្ងៃសុក្រនៅក្នុងកន្លែងប្រគុំតន្ត្រី Crocus City Hall ក្នុងតំបន់ជាយក្រុងម៉ូស្គូ បន្ទាប់មកមានអគ្គីភ័យដ៏ធំមួយ កើតឡើង ។
គណៈកម្មាធិការស៊ើបអង្កេតរុស្ស៊ីបានឲ្យដឹងថា យ៉ាងហោចណាស់មនុស្ស ចំនួន១៣៩នាក់ បានស្លាប់ដោយសារការវាយប្រហារភេរវកម្មនេះ ៕
ដោយ៖ ម៉ៅ បុប្ផាមករា
