បរទេស៖ យោងតាមការចេញផ្សាយរបស់ RT ដែលបានដកស្រង់ចេញពីកាសែត New York Times បានអះអាងថា
ការខ្វះទំនុកចិត្តរវាងសហរដ្ឋអាមេរិក និងរុស្ស៊ីបានរារាំងទីក្រុងវ៉ាស៊ីនតោន ពីការចែករំលែកព័ត៌មានសម្ងាត់ទាំងអស់ដែលខ្លួន
មានអំពីការវាយប្រហារភេរវកម្ម ដែលនឹងត្រូវកើតឡើងនៅទីក្រុងមូស្គូ។
ខ្មាន់កាំភ្លើង៤នាក់ បានបើកការវាយប្រហារភេវរកម្ម ដោយការសម្លាប់រង្គាលដ៏បង្ហូរឈាម ដ៏អាក្រក់បំផុតមួយក្នុងប្រវត្តិសាស្ត្ររុស្ស៊ី កាលពីថ្ងៃសុក្រសប្តាហ៍មុន នៅពេលដែលពួកគេបានផ្ទុះអាវុធ នៅឯកន្លែងប្រគុំតន្ត្រីដ៏ធំមួយ នៅខាងក្រៅរដ្ឋធានី មុនពេលដុតអគារហើយជាលទ្ធផល មនុស្សដល់ទៅ ១៤៣នាក់ ត្រូវបានសម្លាប់ក្នុងការវាយប្រហារនោះ។
កាលពីដើមខែមីនា ស្ថានទូតអាមេរិកនៅទីក្រុងមូស្គូ បានចេញការព្រមានដល់ពលរដ្ឋអាមេរិក អំពីការវាយប្រហារដែលអាចកើតមានដោយឡែក សារមិនសាធារណៈត្រូវបាន ផ្ញើទៅមន្ត្រីសន្តិសុខរុស្ស៊ីផងដែរ ។លោក Aleksandr Bortnikov ប្រធានសេវាសន្តិសុខសហព័ន្ធរុស្ស៊ី (FSB) បានពណ៌នាថាវាជា លក្ខណៈទូទៅ ខណៈពេលដែលរុស្សីបានយកវា មកធ្វើបច្ចុប្បន្នភាពជាសាធារណៈ លើការស៊ើបអង្កេតកាលពីថ្ងៃអង្គារ ។
គួរឲ្យដឹងដែរថានៅក្នុងការ ព្រមានជាសាធារណៈនៅថ្ងៃទី ៧ ខែមីនា ស្ថានទូតបាននិយាយថា ការគំរាមកំហែងគឺធ្ងន់ធ្ងរក្នុងរយៈពេល ៤៨ ម៉ោងបន្ទាប់ប៉ុន្តែ កាសែតនេះបាននិយាយថា វាមិនច្បាស់ទេថា តើស៊ើបការណ៍សម្ងាត់របស់អាមេរិក បានគណនាច្រឡំពេលវេលានៃការវាយប្រហារ ឬក្រុមជ្រុលនិយមពន្យារពេលផែនការរបស់ពួកគេ ដោយឃើញការពង្រឹងសន្តិសុខ កើនឡើងឬយ៉ាងណានោះទេ៕
ប្រែសម្រួល៖ ស៊ុន លី
